قىرعىزستان مينيسترلەر كابينەتى جەرلەۋ راسىمدەرىن رەتتەيتىن جاڭا نۇسقاۋلىقتى بەكىتتى. بۇل قۇجات زيراتتاردىڭ ۇيىمداستىرىلۋى مەن اباتتاندىرىلۋىن، سونداي-اق قابىر ۇستىنە ەسكەرتكىش قويۋ تالاپتارىن ايقىنداماق، دەپ حابارلايدى "ادىرنا" ۇلتتىق پورتالى فەرعاناعا سىلتەپ.
بۇل نۇسقاۋلىقتا بىرقاتار ەرەجەلەر كورسەتىلگەن.
ەڭ اۋەلى، زيراتتاردىڭ قۇرىلىمى مەن جوسپارلانۋى (سەكتورلارعا ءبولۋ، كىرەبەرىس جولدار، كوگالداندىرۋ، اكىمشىلىك عيماراتتار مەن قارالى الاڭدار سالۋ), زيراتتاردى كۇتىپ-ۇستاۋ جانە اباتتاندىرۋ، سۋ مەن جارىقپەن قامتۋ، سانيتارلىق جاعدايدى قامتاماسىز ەتۋ جانە زيراتقا بارۋ ەرەجەلەرى جانە ازاماتتاردىڭ مىندەتتەرى كورسەتىلگەن.
جاڭا قۇجات بويىنشا، كەز كەلگەن ازاماتقا تۋعان جەرىندە، قايتىس بولعان جەردە، سوڭعى تۇرعان مەكەنجايى بويىنشا نەمەسە جاقىن تۋىستارىنىڭ جانىنا جەرلەنۋگە تەگىن جەر ۋچاسكەسى بەرىلەدى. بۇل جەردەن باس تارتۋعا تىيىم سالىنعان، ال ونىڭ ناقتى ولشەمىن جەرگىلىكتى كەڭەستەر (كەنەشتەر) بەلگىلەيدى. ءوز بەتىنشە جەرلەۋ جانە قايتا جەرلەۋ قاتاڭ تىيىم سالىنعان.
جەرلەۋ راسىمدەرىندە استامشىلىققا جول بەرمەۋ ماقساتىندا بيلىك قىمبات ماتەريالداردان جاسالعان ەسكەرتكىشتەردى قويماۋعا كەڭەس بەرەدى. گرانيت، ءمارمار سياقتى باعالى تاستاردان جاسالعان ەسكەرتكىشتەردەن باس تارتۋ ۇسىنىلعان. قويىلاتىن ەسكەرتكىشتىڭ بيىكتىگى 70 سم-دەن اسپاۋى ءتيىس، ال قورشاۋلار قاراپايىم اعاشتان نەمەسە ارزان ماتەريالداردان جاسالۋى كەرەك.
ەسكەرتكىشكە اتى-ءجونى، تۋعان جانە قايتىس بولعان كۇنى جازىلۋى ءتيىس، ال قوعام نورمالارىنا قايشى ەلەمەنتتەردى قولدانۋعا تىيىم سالىنادى. سونىمەن قاتار، ەسكەرتكىش ورناتۋ جەرگىلىكتى ءوزىن-ءوزى باسقارۋ ورگاندارىنا جازباشا حابارلاۋ ارقىلى عانا جۇزەگە اسادى.
زيرات اۋماعى كەمىندە 1,5 مەتر بيىكتىكتەگى قورشاۋمەن قورشالۋى ءتيىس، ول ءۇشىن جەرگىلىكتى، قولجەتىمدى ماتەريالداردى پايدالانۋ ۇسىنىلادى.
جاڭا ەرەجەلەر 2024 جىلدىڭ قازان ايىندا قابىلدانعان «جەرلەۋ جانە جەرلەۋ ءىسى تۋرالى» زاڭدى ىسكە اسىرۋ جونىندەگى پرەزيدەنت جارلىعىنا سايكەس ازىرلەندى.
