Qyrǵyzstan mınıstrler kabıneti jerleý rásimderin retteıtin jańa nusqaýlyqty bekitti. Bul qujat zırattardyń uıymdastyrylýy men abattandyrylýyn, sondaı-aq qabir ústine eskertkish qoıý talaptaryn aıqyndamaq, dep habarlaıdy "Adyrna" ulttyq portaly Ferǵanaǵa siltep.
Bul nusqaýlyqta birqatar erejeler kórsetilgen.
Eń áýeli, zırattardyń qurylymy men josparlanýy (sektorlarǵa bólý, kireberis joldar, kógaldandyrý, ákimshilik ǵımarattar men qaraly alańdar salý), zırattardy kútip-ustaý jáne abattandyrý, sý men jaryqpen qamtý, sanıtarlyq jaǵdaıdy qamtamasyz etý jáne zıratqa barý erejeleri jáne azamattardyń mindetteri kórsetilgen.
Jańa qujat boıynsha, kez kelgen azamatqa týǵan jerinde, qaıtys bolǵan jerde, sońǵy turǵan mekenjaıy boıynsha nemese jaqyn týystarynyń janyna jerlenýge tegin jer ýchaskesi beriledi. Bul jerden bas tartýǵa tyıym salynǵan, al onyń naqty ólshemin jergilikti keńester (keneshter) belgileıdi. Óz betinshe jerleý jáne qaıta jerleý qatań tyıym salynǵan.
Jerleý rásimderinde astamshylyqqa jol bermeý maqsatynda bılik qymbat materıaldardan jasalǵan eskertkishterdi qoımaýǵa keńes beredi. Granıt, mármár sııaqty baǵaly tastardan jasalǵan eskertkishterden bas tartý usynylǵan. Qoıylatyn eskertkishtiń bıiktigi 70 sm-den aspaýy tıis, al qorshaýlar qarapaıym aǵashtan nemese arzan materıaldardan jasalýy kerek.
Eskertkishke aty-jóni, týǵan jáne qaıtys bolǵan kúni jazylýy tıis, al qoǵam normalaryna qaıshy elementterdi qoldanýǵa tyıym salynady. Sonymen qatar, eskertkish ornatý jergilikti ózin-ózi basqarý organdaryna jazbasha habarlaý arqyly ǵana júzege asady.
Zırat aýmaǵy keminde 1,5 metr bıiktiktegi qorshaýmen qorshalýy tıis, ol úshin jergilikti, qoljetimdi materıaldardy paıdalaný usynylady.
Jańa erejeler 2024 jyldyń qazan aıynda qabyldanǵan «Jerleý jáne jerleý isi týraly» zańdy iske asyrý jónindegi prezıdent jarlyǵyna sáıkes ázirlendi.
