انتيكوردىڭ ەكس-باستىعى اليك شپەكباەۆ سينگاپۋردا وتكەن تويدا كوزگە ءتۇستى، دەپ حابارلايدى «ادىرنا» ءتىلشىسى.
تانىمال بلوگەر ءارى PR مامانى الىشەر ەلىكباەۆ جەلىگە جۇكتەگەن ۆيدەودا شپەكباەۆتىڭ قوناقتار قاتارىندا وتىرعانى بايقالادى. ول جاستاردى قارسى الۋ ءراسىمى كەزىندە كادرعا ىلىنگەن.
ەسكە سالايىق، 2018 جىلى اليك شپەكباەۆ اتاعىن شىعارۋ ءۇشىن تويدى جارمەڭكە قۇساپ وتكىزەتىن شەنەۋنىكتەردى سىنعا العان ەدى.
«الەۋمەتتىك جەلىلەردە كەڭ كولەمدە جانە داڭعازالىقپەن وتكەن ۇيلەنۋ تويلارىنان بەينەجازبالار ءجيى تارايدى. زال تولى گۇلدەر، شوۋ-بيزنەس جۇلدىزدارى ساحنادا، 500-600 قوناق. كەيىن بۇل شارانى ۇيىمداستىرعان وبلىستىق باسقارما باسشىسى نەمەسە مەملەكەتتىك قىزمەتكەر ەكەنى انىقتالىپ جاتادى. مۇنداي ءۇردىس كەڭ ەتەك جايدى. وسى بەينەجازبالار قوعامدا كوپتەگەن سۇراقتار تۋىنداتادى، ولاردىڭ ىشىندەگى ەڭ وزەكتىسى – «بۇل قارجى قايدان كەلگەن؟». تاعى ءبىر ماڭىزدى ماسەلە – قاراپايىم مەملەكەتتىك قىزمەتشىلەر دە باسشىلارىنان قالىسپاي، مۇمكىندىكتەرىنە قاراي دۇركىرەتىپ توي وتكىزۋگە ۇمتىلادى. بۇل جاعداي باسقارۋ مودەلىنە دە، قۇندىلىقتارعا دا وڭ اسەر ەتپەيدى، كەرىسىنشە، داڭعويلىقتىڭ كورىنىسىنە اينالادى»،—دەدى ول.
