2025 جىلى استانادا ۇلى وتان سوعىسىنداعى جەڭىستىڭ 80 جىلدىعىنا وراي اۋقىمدى اسكەري شەرۋ وتەدى. بۇل شارانىڭ ۇيىمداستىرۋ جۇمىستارىنا مەملەكەتتىك بيۋدجەتتەن 2,5 ميلليارد تەڭگە بولىنبەك، دەپ حابارلايدى "ادىرنا" ۇلتتىق پورتالى.
قورعانىس مينيسترلىگى تاربيە جانە يدەولوگيالىق جۇمىستار دەپارتامەنتىنىڭ وكىلى، پولكوۆنيك ۆيتالي ءاداموۆيچتىڭ ايتۋىنشا، بولىنگەن قاراجات جانار-جاعارماي مەن قوسالقى بولشەكتەردى ساتىپ الۋعا، اسكەريلەردىڭ ءىسساپار شىعىندارىنا، اسكەر قوزعالىسىنا جانە جاڭا اسكەري فورمالاردى تىگۋگە جۇمسالادى.
اسكەري شەرۋ جاياۋ اسكەرلەردىڭ، مەحانيكالاندىرىلعان تەحنيكانىڭ جانە اسكەري اۆياتسيانىڭ قاتىسۋىمەن وتەدى.
بيىلعى شەرۋدىڭ ەرەكشەلىگى – قازاقستان اۋماعىندا قۇرىلعان 23 ديۆيزيا مەن بريگادالاردىڭ جاۋىنگەرلىك تۋلارى الاڭدا كورسەتىلەدى. سونىمەن قاتار، اسكەري تاريح مۇراجايىندا ساقتالعان ت-34 تانكى شەرۋگە قاتىسادى. شەرۋ كەزىندە سوڭعى جىلدارى ساتىپ الىنعان قارۋ-جاراق پەن اسكەري تەحنيكالار كورسەتىلەدى. شەرۋگە بارلىعى 4,5 مىڭعا جۋىق ادام قاتىسادى.
