يزرايل پرەمەر-ءمينيسترى بينيامين نەتانياحۋ حاماس سەنبى كۇنى تۇتقىنداردى قايتارماسا، گازا سەكتورىندا اسكەري ارەكەتتەردى قايتا باستايتىنىن مالىمدەدى، دەپ حابارلايدى "ادىرنا" ۇلتتىق پورتالى ۆۆس-ءدىڭ ورىس قىزمەتىنە سىلتەپ.
«ەگەر حاماس ءبىزدىڭ تۇتقىندارىمىزدى سەنبى كۇنگى تۇسكە دەيىن قايتارماسا، ءبىتىم اياقتالادى، ال تساحال حاماس تولىق جويىلعانشا، اسكەري ارەكەتتەردى قارقىندى تۇردە جالعاستىرادى»، – دەلىنگەن نەتانياحۋدىڭ مالىمدەمەسىندە.
يزرايل پرەمەرى حاماس-تىڭ «كەلىسىمدى بۇزىپ، تۇتقىنداردى بوساتۋدان باس تارتقاننان» كەيىن، تساحال-عا گازا سەكتورىنىڭ ىشىندە جانە ونىڭ اينالاسىندا كۇشتەردى شوعىرلاندىرۋعا بۇيرىق بەرگەنىن ايتتى. ونىڭ سوزىنشە، «بۇل وپەراتسيا جاقىن ارادا اياقتالادى».
بۇعان دەيىن حاماس ءيزرايلدى ءبىتىم شارتتارىن بۇزدى دەپ ايىپتاپ، يزرايلدىك تۇتقىنداردى پالەستينالىق تۇتقىندارعا ايىرباستاۋ پروتسەسىن بەلگىسىز مەرزىمگە توقتاتقانىن مالىمدەگەن.
حاماس كەلىسىمنىڭ ءبىرىنشى كەزەڭىندە بوساتۋى ءتيىس 33 يزرايلدىكتىڭ 16-سى ۇيىنە ورالدى. ولاردىڭ سەگىزى قايتىس بولعانى انىقتالدى. حاماس ءالى دە توعىز ءتىرى تۇتقىندى قايتارۋى كەرەك.
يزرايل بيلىگىنىڭ مالىمەتىنشە، كەلىسىمنىڭ العاشقى كەزەڭى ماقۇلدانعان كەزدە حاماس تۇتقىنىندا 94 ادام بولعان.
ايتا كەتەيىك، يزرايل مەن حاماس اراسىنداعى كەلىسىم ءۇش كەزەڭنەن تۇرادى. ءبىرىنشى كەزەڭ 42 كۇنگە ۋاقىتشا اتىستى توقتاتۋدى قاراستىرادى. وسى كەزەڭدە حاماس 33 يزرايلدىك تۇتقىندى قايتارىپ، يزرايل شامامەن 1,9 مىڭ پالەستينالىق تۇتقىندى بوساتادى. سونداي-اق گازا سەكتورىنىڭ تۇرعىن اۋداندارىنان اسكەرىن شىعارادى. بۇل گۋمانيتارلىق كومەكتىڭ ايماققا جەتۋىنە مۇمكىندىك بەرەدى. ءبىرىنشى كەزەڭنىڭ 16-كۇنى تاراپتار ەكىنشى كەزەڭدى تالقىلاۋعا كوشەدى، وندا تولىقتاي اتىستى توقتاتۋ، قالعان يزرايلدىك تۇتقىنداردى پالەستينالىقتارعا ايىرباستاۋ جانە يزرايل اسكەرىن گازا سەكتورىنان تولىق شىعارۋ قاراستىرىلادى. ءۇشىنشى كەزەڭدە حاماس يزرايلگە ولتىرىلگەن تۇتقىنداردىڭ دەنەلەرىن قايتارادى، ال حالىقارالىق دونورلار گازا سەكتورىن قالپىنا كەلتىرۋ جۇمىستارىن باستايدى.
