قازاقستاننىڭ ەكس-پرەزيدەنتى نۇرسۇلتان نازارباەۆتىڭ قىزى ءاليا نازارباەۆاعا تاعىلعان رەيدەرلىك ايىپتار بويىنشا ماتەريالدار ۇلىبريتانيا مەن شۆەيتسارياعا جىبەرىلدى، دەپ حابارلايدى "ادىرنا" ۇلتتىق پورتالى.
كاسىپكەر نۇرلان بيمۋرزين Elmedia-عا بەرگەن سۇحباتىندا، ءاليا نازارباەۆانىڭ جىلدار بويى ۇلىبريتانيا مەن شۆەيتساريادا قوماقتى مۇلىك پەن اكتيۆتەر جيناعانىن ايتتى. ونىڭ ايتۋىنشا، بۇل قاراجات ەليتالىق جىلجىمايتىن مۇلىك پەن باسقا دا اكتيۆتەردى ساتىپ الۋعا جۇمسالعان.
شۆەيتسارياعا جىبەرىلگەن قۇجات ەلدىڭ باس پروكۋرورى ستەفان بلاتتلەردىڭ اتىنا جولدانعان. وندا ۇلىبريتانيا مەن شۆەيتساريا بيلىگى بۇل ءىستى تەرگەۋگە قۇزىرەتتى ەكەنى كورسەتىلگەن. قازاقستاندىق كاسىپكەرلەر تەرگەۋ ورگاندارىنا بىرنەشە رەت جۇگىنگەنىمەن، ەشقانداي ناتيجە الا الماعانىن ايتادى. ولاردىڭ وتىنىشتەرى جاۋاپسىز قالعاندىقتان، ولار حالىقارالىق سوتتارعا جۇگىنۋگە ءماجبۇر.
كاسىپكەرلەردىڭ ماقساتى – ءاليا نازارباەۆاعا قاتىستى قىلمىستىق ءىس قوزعاۋ جانە بۇل تالاپتارىنىڭ نەگىزدى ەكەنىن دالەلدەۋ. قازاقستاننىڭ باس پروكۋراتۋراسىنان الىنعان بارلىق جاۋاپتار نوتاريالدى اۋدارىلىپ، دالەلدەمەلەرمەن بىرگە شەتەلدىك ورگاندارعا جىبەرىلدى.
كاسىپكەردىڭ ايتۋىنشا، اقش تەرگەۋ ورگاندارى دا بۇل ىسكە نازار اۋدارىپ وتىر. بۇعان دەيىن ولار جىبەرگەن وتىنىشكە اقش تەرگەۋ ورگاندارىنان جاۋاپ كەلگەن. بيلىك اۋىسۋىنا بايلانىستى تەرگەۋ كەيىنگە شەگەرىلگەنىمەن، بۇل ءىس باقىلاۋدا تۇر جانە جاقىن ارادا قارالاتىنى ايتىلعان.
ءبيمۋرزيننىڭ ايتۋىنشا، اقش-تاعى جاڭا اكىمشىلىك بيزنەس-ەليتالاردىڭ اشىقتىعىنا باسا ءمان بەرۋدە. سونىمەن قاتار، ول بارلىق وتىنىشتەردىڭ ەكس-پرەزيدەنتتەر مەن ولاردىڭ وتباسى مۇشەلەرىنىڭ جەكە ومىرىنە قاتىستى مالىمەتتەردى جاريالاماۋ تۋرالى زاڭ كۇشىنە ەنگەنگە دەيىن جىبەرىلگەنىن اتاپ ءوتتى. بۇل زاڭ بولاشاقتا وسىنداي تەرگەۋلەردىڭ اشىقتىعىنا اسەر ەتۋى مۇمكىن. ەندى كاسىپكەرلەر ۇلىبريتانيا، شۆەيتساريا جانە اقش-تاعى تەرگەۋ امالدارىنان ادىلدىك كۇتۋدە.
