ەلىمىزدە بالا كۇتىمىمەن ۇيدە وتىرعان اكە قۇقىقتارى انا قۇقىقتارىمەن بىردەي بولادى. بۇل تۋرالى بۇگىن، 10 اقپاندا كونستيتۋتسيالىق سوت ايتتى، دەپ حابارلايدى «ادىرنا» ءتىلشىسى.
قۇزىرلى ورگان الەۋمەتتىك كودەكستىڭ ءبىر بابى بالا كۇتىمىنە بايلانىستى دەمالىسقا شىققان اكەلەردىڭ قۇقىقتارىن شەكتەيدى دەپ تانىدى.
ت.ەسىمدى قازاقستاندىق كونستيتۋتسيالىق سوتقا الەۋمەتتىك كودەكستىڭ 208-بابىنىڭ 1-تارماعىن، “جاسى بويىنشا زەينەتاقى تولەمدەرىن تاعايىنداۋعا ەڭبەك ءوتىلىن ەسەپتەۋدى” تەكسەرۋدى وتىنگەن. ول زەينەتاقى تولەمدەرىن تاعايىنداۋ ءۇشىن قاجەت ەڭبەك ءوتىلىن ەسەپتەۋ كەزىندە تەك انانىڭ بالا كۇتىمىنە بايلانىستى دەمالىس كەزەڭى ەسكەرىلەتىنىن جەتكىزگەن.
ەر ادام بالاسى دۇنيەگە كەلگەننەن كەيىن ەكى اي وتكەن سوڭ دەنساۋلىعىندا كىناراتى بار سابيىنە كۇتىم جاساۋ ءۇشىن جۇمىستان شىققانىن مالىمدەدى. ايتۋىنشا، ايەلى اۋىرماعاندىقتان، جاڭا تۋعان بالاعا قاراي الماعان.
كەيىننەن ەر ادامنىڭ بالا كۇتىمىنە جۇمساعان ۋاقىتى ونىڭ جۇمىس تاجىريبەسىنە ەسەپتەلمەگەنى انىقتالعان. بۇعان الەۋمەتتىك كودەكس ەرەجەسى نەگىز بولعان. ەر ادام سوتقا ارىزدانىپ، بۇل ەكى اتا-انانىڭ تەڭ قۇقىعى قاعيداسىنا قايشى كەلەتىنىن جەتكىزگەن.
ناتيجەسىندە كونستيتۋتسيالىق سوت ءسوز بولىپ وتىرعان زاڭ ەرەجەسى كونستيتۋتسياعا قايشى دەگەن قورىتىندىعا كەلدى. ۆەدومستۆو الەۋمەتتىك كودەكستىڭ 208-بابى 1-تارماعى 8-تارماقشاسىن بىلايشا وزگەرتكەن ۋاقىتتا اتا زاڭعا ساي كەلەدى دەپ تانىدى: «جۇمىس ىستەمەيتىن اتا-اناعا جاسىنا بايلانىستى زەينەتاقى تولەمدەرىن تاعايىنداۋ ءۇشىن ەڭبەك ءوتىلىن ەسەپتەۋ كەزىندە جاس بالالارعا تىكەلەي كۇتىمدى جۇزەگە اسىرعان ۋاقىتى ەسەپكە الىنادى».
وسىلايشا باپقا دەكرەت دەمالىسىنا شىققان اكەلەر دە ەندى.
«بالاعا كۇتىم جاساۋ اتا-انادان ەرەكشە قامقورلىق پەن قورعاۋدى قاجەت ەتەدى. بالا ءومىرىنىڭ وسى كەزەڭىندە وبەكتيۆتى ءمان-جايلارعا بايلانىستى ولاردىڭ كەز كەلگەنى بالاسىنا ناقتى قامقورلىق جاساۋعا بايلانىستى جۇمىستان شەكتەلۋى مۇمكىن. اتا-انا مىندەتتەرىن ورىنداۋدان تۋىندايتىن مۇنداي جاعدايلاردى الەۋمەتتىك قورعاۋ سالاسىنداعى مەملەكەتتىك ساياسات شەڭبەرىندە وتەماقى تەتىكتەرىن ازىرلەۋ كەزىندە ەسكەرۋ قاجەت. ولاردىڭ ءبىرى – تەڭدىگى جانە الەۋمەتتىك قورعاۋ سالاسىنداعى ادام مەن ازاماتتىڭ قۇقىقتارىن شەكتەۋگە جول بەرمەۋ»،– دەپ ءتۇسىندىردى كونستيتۋتسيالىق سوت.
