تۇرىكمەنستان بيلىگى بارلىق فۋتبول كلۋبتارىنا شەتەلدە وقۋ-جاتتىعۋ جيىندارىنا بارۋعا تىيىم سالدى. بۇل تۋرالى فەرعانا اگەنتتىگىنە كلۋب قىزمەتكەرى ايتقان، دەپ حابارلايدى “ادىرنا” ۇلتتىق پورتالى.
دەرەككوزدىڭ ايتۋىنشا، اقپان ايىندا تۇرىكمەن كلۋبتارىنىڭ ءبىرىنىڭ شەتەلدەگى جيىندا جولداستىق كەزدەسۋ وتكىزۋ تۋرالى كەلىسىم جەلتوقسان ايىندا جاسالعان. الايدا قاڭتار ايىنىڭ ورتاسىندا تۇرىكمەنستان كلۋبىنىڭ باسشىلىعى بيلىكتىڭ بارلىق كلۋبتارعا شەتەلدە وقۋ-جاتتىعۋ جيىندارىنا قاتىسۋعا تىيىم سالعانىن حابارلاعان. وسىعان بايلانىستى ويىندار كەستەسى وزگەرتىلىپ، جاڭا قارسىلاس ىزدەۋگە تۋرا كەلگەن.
شەتەلدىك كلۋبتاردىڭ تۇركيا مەن ءباا-گە جاساعان وقۋ-جاتتىعۋ جيىندارىنا «اركاداگ» پەن «احال» كلۋبتارىنا قارسى ويىندار ەنگىزىلگەنى بەلگىلى. «اركاداگ» تۇركيادا قازاقستاننىڭ «قايسارىمەن» جانە ارمەنيانىڭ «ۋرارتۋىمەن» ويناۋى ءتيىس بولعان، ال «احال» تۇركيادا وزبەكستاننىڭ «سۋرحانى» كومانداسىنا قارسى ويناۋى ءتيىس ەدى. بىراق وسى ماتچتاردىڭ ءبارى وتپەي قالدى.
فەرعانا اگەنتتىگىنىڭ مالىمەتى بويىنشا، ويىنداردى بىرجاقتى تۇردە بولدىرماۋ ءۇشىن شاعىن ايىپپۇل قاراستىرىلعان — كولەمى 3-تەن 5 مىڭ دوللار ارالىعىندا. دەگەنمەن، ارمياندىق، قازاقستاندىق جانە وزبەك كلۋبتارى تۇرىكمەندەردەن ەشقانداي وتەماقى تالاپ ەتپەگەن. ءبىر كلۋبتىڭ حابارلاۋىنشا، ولار «جاعدايدى ءتۇسىنىپ، قولداۋ بىلدىرگەن».
ايتا كەتەيىك، جىلى كليماتتاعى ەلدەردە قىسقى وقۋ-جاتتىعۋ جيىندارىن وتكىزۋ فۋتبول كوماندالارى ءۇشىن قالىپتى جاعداي، ولار جارىستارعا دايىندالىپ، ىڭعايلى جاعدايدا جاتتىعادى. تۇرىكمەنستان چەمپيوناتى ناۋرىز ايىندا باستالادى. سونداي-اق ناۋرىز ايىندا ەل چەمپيونى «اركاداگ» كلۋبى ءوزىنىڭ تاريحىنداعى العاشقى ليگا شاقىرۋى ءتۋرنيرىنىڭ پلەي-وفف ماتچتارىن وتكىزەدى.
تۇرىكمەن بيلىگى ۇلتتىق قۇرامانىڭ شەتەلگە شىعۋىنا نەمەسە وقۋ-جاتتىعۋ جيىندارىنا قارجى بولۋگە بىرقاتار شەكتەۋلەر قويىپ وتىرادى. مىسالى، وتكەن كۇزدە ۇلتتىق قۇرامانى ءباا-گە جانە ەۋروپاعا مالتا قۇراماسىمەن جولداستىق ماتچقا جىبەرمەگەن. الايدا كلۋبتار ءۇشىن بۇعان دەيىن مۇنداي شەكتەۋلەر بولماعان، تەك كەيبىر ويىنشىلارعا قاتىستى ارنايى جاعدايلار بولعان. مىسالى، ۇلتتىق قۇرامانىڭ قاقپاشىسى راحات جاپاروۆتىڭ شەتەلگە شىعۋىنا ەش سەبەپسىز تىيىم سالىنعان.
اقپاراتقا سايكەس، تۇرىكمەنستان بيلىگى فۋتبول كلۋبتارىنىڭ وقۋ-جاتتىعۋ جيىندارىن ارتىق دەپ سانايدى، سوندىقتان ولاردى قارجىلاندىرمايدى.
