بۇگىندە اۋىلدى جەرلەرگە مۇعالىمدەر بارىپ، جۇمىس ىستەگەسى كەلمەيدى. ويتكەنى جاستار ەشقانداي جاعداي جاسالماعان شالعايداعى اۋىلدان قاراعاندا قالادا تۇرعاندى قوش كورەدى. وسى ماسەلەنى شەشۋ ءۇشىن ۇكىمەت «ديپلوممەن اۋىلعا» باعدارلاماسىن جۇزەگە اسىرعان بولاتىن.
جامبىل وبلىسىندا وسى جىلدىڭ باسىنان بەرى «ديپلوممەن اۋىلعا» باعدارلاماسى اياسىندا 201 مامان اۋىلدىق جەرلەرگە جۇمىسقا ورنالاسىپ، ءوز ورنىن تاپتى. وبلىستىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى گۇلدانا جاۋىنبەكوۆانىڭ ايتۋىنشا، باعدارلامانىڭ پايداسى زور. سونداي-اق باعدارلامامەن اۋىلعا بارعانداردىڭ باسىم كوپشىلىگى ءبىلىم جانە دەنساۋلىق ساقتاۋ سالاسىندا ەڭبەك ەتىپ جۇرگەنىن تىلگە تيەك ەتتى. ناقتىراق ايتساق، مەملەكەتتىك جوباعا قاتىسۋشىلارىنىڭ 121-ءى ءبىلىم، 55-ءى دەنساۋلىق ساقتاۋ، 30-ى اۋىل شارۋاشىلىعى جانە 5 مامان مادەنيەت پەن سپورت سالاسىنا تارتىلعان.
«جالپى جوبا جوبا باستالعالى بەرى وبلىستا 1700-دەي مامان اۋىلدارعا بارعان. الايدا وڭىردە مۇعالىمدەر مەن دارىگەرلەر ءالى دە تاپشى. اسىرەسە قورداي، شۋ، بايزاق جانە جامبىل اۋداندارىندا بۇل ماسەلە وتكىر سەزىلىپ وتىر. جالپى بيىل 256 جاس مامانعا جەڭىلدەتىلگەن نەسيە بەرۋ جوسپارلانعان. تاعى 277 ادام اۋىلدى ەلدى مەكەندەردە جۇمىس ىستەۋگە ءوتىنىش بەرگەن. سونداي-اق وبلىسىمىزدا بۇگىنگى كۇنى 227 مامانعا تاعى دا مامانداردىڭ تاراپىنان قاجەتتىلىك كەلىپ ءتۇستى. ول 1 ميللياردقا جۋىق نەسيە الۋ بويىنشا. ەندى بىزدە بولىنەتىن 5,2 ميلليارد تەڭگە كولەمىنە وبلىستىڭ قاجەتتىلىگىنە ۇسىنىس جاسادىق. ناقتىلاۋ بارىسىندا بۇل قارجىدان ءوزىمىزدىڭ ۇلەسىمىزدى الاتىن بولامىز. الايدا، باعدارلامادا ناقتى وسىنداي ماماندىققا باسىمدىق بەرىلسىن دەگەن نۇسقاما جوق. كەزەك بويىنشا ماماندار ەلدى مەكەنگە كەلىپ ءوزىنىڭ ءوتىنىمىن بەرەدى. سول كەزەككە سايكەس ونىڭ ءوتىنىمى قاراستىرىلادى. بۇل ماسەلە دەپۋتاتتارمەن دە قاراستىرىلۋدا. ءار وڭىردە قانداي مامانعا تاپشىلىق بار، سول بويىنشا باسىمدىقتى سول ماماندىققا بەرۋ تۋرالى. بىراق بۇل وزگەرىس ءالى جوباعا ەنگىزىلگەن جوق»، – دەدى گۇلدانا جاۋىنبەكوۆا.
ايتا كەتۋ كەرەك، بيىل «ديپلوممەن اۋىلعا» باعدارلاماسىمەن ەكى باعىت بويىنشا بەرىلەتىن الەۋمەتتىك كومەك كولەمى ارتتى. بۇرىن كوتەرمە جاردەماقى 176 مىڭ تەڭگە بولسا، ەندى 252 مىڭ تەڭگەگە كوتەرىلدى. ال 0,01 پايىزبەن بەرىلەتىن بيۋدجەتتىك نەسيە 1500 ايلىقتىق ەسەپتىك كورسەتكىشكە كوبەيگەن.
«ادىرنا»
ۇلتتىق پورتالى
