جۋىردا جامبىل وبلىسى اكىمى اسقار مىرزاحمەتوۆ ۇكىمەتكە ارنايى ۇسىنىسپەن شىعىپ، ول قولداۋ تاپقان بولاتىن. اۋىل تۇرعىندارىنىڭ تۇرمىسىن جاقسارتۋعا باعىتتالعان پيلوتتىق جوبانى ىسكە اسىرۋ بويىنشا قىزۋ جۇمىس باستالدى.
جوبا بويىنشا وبلىستىڭ ءار اۋدانىنان ءبىر-ءبىر اۋىلدىق وكرۋگ تاڭدالعان بولاتىن. وندا اتالمىش اۋقىمدى جوبا العاشقى كەزەڭ نەگىزىندە پيلوتتىق رەجيمدە جۇزەگە اسپاق. وسىعان وراي وبلىس اكىمى اسقار مىرزاحمەتوۆتىڭ ءوزى اۋداندارعا ءىس-ساپارعا شىعىپ، اتالمىش ون اۋىلدىق وكرۋگتەرگە ارنايى بارۋدى باستادى. ونداعى ماقسات - تۇرعىندارمەن تىكەلەي جۇزدەسىپ، اتقارىلار جوبالاردىڭ بارىسىن بارلاۋ.
ايماق باسشىسى اۋەلى جامبىل اۋدانىنداعى بەساعاش اۋىلدىق وكرۋگىنە بارىپ، جەرگىلىكتى تۇرعىندارمەن كەزدەستى. ەركىن فورماتتا وتكەن جيىندا اۋىلدىقتار وزدەرىنىڭ كوزدەپ وتىرعان جوسپارلارىمەن ءبولىستى.
«اشىعىن ايتۋ كەرەك، بۇگىندە اۋىلدارداعى جەكە قوسالقى شارۋاشىلىق جەرلەرىن ۇتىمدى ۇقساتۋ ويداعىداي ەمەس. ونى ءتيىمدى تابىس كوزىنە اينالدىرۋ – تۇرعىنداردىڭ تىكەلەي وزىنە بايلانىستى بولىپ وتىر. ال، جوبا اياسىندا جەرگىلىكتى حالىققا قولداۋ مۇمكىندىگى رەتىندە 2,5 پايىزبەن نەسيە بەرىلمەك»، – دەدى وبلىس اكىمى.
كەزدەسۋدە اكىم وسىنى باسا ايتىپ، كوكەيدەگى كوپ ساۋالدارعا ناقتى جاۋاپتار بەرىپ، تۇيتكىلدى جايتتاردى جان-جاقتى ءتۇسىندىردى.
بەساعاش اۋىلدىق وكرۋگىنە بەساعاش جانە تۇركسىب ەلدىمەكەندەرى قارايدى. وندا بارلىعى 1 336 اۋلا يەلەرى جانە 10 كوپقاباتتى تۇرعىن ۇيدە تۇراتىن 160 وتباسى بار. جالپى حالىق سانى - 6 820 ادام. وكرۋگتەگى 1176 اۋلادا جەكە قوسالقى شارۋاشىلىعى بار دەسەك، ونداعى ءۇي ىرگەسىندەگى جەر كولەمى 154,9 گەكتاردى قۇرايدى. ونىڭ سۋمەن قامتىلعانى 771 اۋلا (104,5 گا), پايدالانباي جاتقانى 405 اۋلا (50,4 گا).
بۇگىنگە دەيىن جوبانىڭ ءبىرىنشى باعىتى بويىنشا وسى وكرۋگتەن 1176 اۋلا ءوتىنىم بەرىپ ۇلگەرگەن. ال، مال شارۋاشىلىعى بويىنشا 128 اۋلا يەلەرىنەن ءتيىمدى نەسيەگە دەگەن سۇرانىس تۇسكەن. باسقا دا قالعان ءۇش باعىت اياسىندا دا قىزۋ جۇمىستار جۇرگىزىلۋدە.
اۋىل شارۋاشىلىعى سالاسىنان باسقا، پيلوتتىق وكرۋگتا جالپى شاعىن كاسىپ بويىنشا 30 ميلليوننان استام تەڭگەنىڭ 14 جوباسى ۇسىنىلىپ وتىر. ونىڭ ىشىندە: شاشتاراز، مونشا، تىگىن تسەحى جانە تاعى باسقا دا جوبالار بار. ال، تۇرعىنداردىڭ الەۋمەتتىك-تۇرمىسىن جاقسارتۋعا بارلىعى پيلوتتىق وكرۋگ بويىنشا 131 جوباعا سۇرانىس بىلدىرىلگەن.
جيىننان سوڭ اۋىل تۇرعىندارىنىڭ باۋ-باقشالارىمەن تانىسقان ايماق باسشىسى بەساعاش اۋىلى بەكەەۆ كوشەسىندە ورنالاسقان مۋرات بايانباەۆتىڭ جىلىجايىنىڭ جۇمىسىن بارلادى. اۋماعى 0,7 گەكتاردى قۇرايتىن جىلىجايدان جىلىنا ەكى رەت ءونىم الىنسا، تازا تابىسى 300 مىڭ تەڭگەگە اينالۋدا. اسقار يسابەكۇلى جوبا اياسىندا جىلىجايدىڭ جۇمىسىن جانداندىرىپ، ءونىم كولەمىن ارتتىرۋ قاجەتتىگىن باسا ايتتى. سونداي-اق، ءۇي ىرگەسىندەگى جەرىن تيىمدى يگەرىپ وتىرعان جىلىجاي يەسىن وزگەلەرگە ۇلگى رەتىندە ۇسىنۋدىن ماڭىزدىلىعىنا توقتالدى.
«ادىرنا»
ۇلتتىق پورتالى
