بۇگىنگى كۇنى 14 مىڭعا جۋىق اقمولالىق بالا ينكليۋزيۆتى ءبىلىم الۋدى قاجەت ەتەدى. ولاردىڭ سانى جىل ساناپ ارتىپ كەلەدى، ونىڭ ىشىندە 200 جۋىعى اۋتيزم. مۇنداي ءوسىم قولجەتىمدى ءبىلىم بەرۋ ورتاسىنىڭ كەڭەيۋىن جانە ءبىلىم وردالارى قابىرعالارىندا ارنايى كابينەتتەر اشۋ قاجەتتىلىگىن ارتتىرۋدا. بۇل جونىندە تولىعىراق وبلىستىق ءبىلىم باسقارماسىنىڭ مەكتەپكە دەيىنگى جانە جالپى ورتا ءبىلىم بەرۋ ءبولىمىنىڭ باسشىسى اسەمگۇل سۇلەيمەنوۆا بريفينگتە ءمالىم ەتتى، دەپ حابارلايدى وڭىرلىك كوممۋنيكاتسيالار قىزمەتىنەن.
ەرەكشە ءبىلىم بەرۋ قاجەتتىلىكتەرى بار بالالاردى قولداۋ ءۇشىن وبلىستا ارنايى مەكتەپتەر، رەسۋرستىق ورتالىقتار مەن تۇزەتۋ كابينەتتەرى جۇمىس ىستەيدى. وتكەن جىلى كوكشەتاۋدا 166 ورىندىق «ايالا» بالاباقشاسى اشىلدى، بيىل تاعى 280 ورىندىق بالاباقشا اشۋ جوسپارلانىپ وتىر.
«ينكليۋزيۆتى ءبىلىم بەرۋ باعىتى وبلىستا جاقسى دامىپ كەلەدى. 2025 جىلى 30 جاڭا كابينەت اشىلادى، وعان 375 ميلليون تەڭگە ءبولىندى. بالالاردى تاسىمالداۋعا ارنالعان 20 ارنايى اۆتوبۋس ساتىپ الىندى»، — دەپ مالىمدەدى اسەمگۇل سۇلەيمەنوۆا.
سونىمەن قاتار، 2020 جىلدان باستاپ وبلىستا اۋتيزممەن اۋىراتىن بالالاردى قولداۋ بويىنشا مەملەكەتتىك باعدارلاما ىسكە اسىرىلۋدا، وسى ارقىلى 55 بالا كومەك الدى.
ايتۋىنشا، مامانداندىرىلعان مەكەمەلەر اشۋمەن قاتار، «ەرەكشە» بالالارمەن جۇمىس ىستەيتىن مامانداردى دايارلاۋ جانە تارتۋ ماسەلەسى دە ماڭىزدى. ءبىلىم بەرۋ قىزمەتىنىڭ ساپاسى مەن تۇزەتۋ جۇمىستارى پەداگوگتەردىڭ كاسىبي شەبەرلىگىنە تىكەلەي بايلانىستى.
«قازىر بىزدە 1090 ارنايى پەداگوگ جۇمىس ىستەيدى. ولار لوگوپەدتەر، دەفەكتولوگتار، تيفلوپەداگوگتار، سۋردوپەداگوگتار، وليگوفرەنوپەداگوگتار جانە پسيحولوگ-پەداگوگتار. بالالار سانىنىڭ ءوسۋى قوسىمشا رەسۋرستاردى تالاپ ەتەدى. ءبىز جوعارى وقۋ ورىندارىمەن جانە كوللەدجدەرمەن بەلسەندى جۇمىس ىستەيمىز، پەداگوگيكالىق جارمەڭكەلەرگە قاتىسىپ، بىلىكتى مامانداردى تارتۋعا تىرىسامىز. ءار مەكتەپ قازىردىڭ وزىندە كادرلىق قاجەتتىلىكتى جوسپارلاپ، بولاشاقتا مامان تاپشىلىعىنا تاپ بولماس ءۇشىن جۇمىس ىستەۋى ماڭىزدى»، — دەپ قورىتىندىلادى سپيكەر.
