Búgingi kúni 14 myńǵa jýyq Aqmolalyq bala ınklıýzıvti bilim alýdy qajet etedi. Olardyń sany jyl sanap artyp keledi, onyń ishinde 200 jýyǵy aýtızm. Mundaı ósim qoljetimdi bilim berý ortasynyń keńeıýin jáne bilim ordalary qabyrǵalarynda arnaıy kabınetter ashý qajettiligin arttyrýda. Bul jóninde tolyǵyraq oblystyq bilim basqarmasynyń mektepke deıingi jáne jalpy orta bilim berý bóliminiń basshysy Ásemgúl Súleımenova brıfıngte málim etti, dep habarlaıdy Óńirlik kommýnıkaııalar qyzmetinen.
Erekshe bilim berý qajettilikteri bar balalardy qoldaý úshin oblysta arnaıy mektepter, resýrstyq ortalyqtar men túzetý kabınetteri jumys isteıdi. Ótken jyly Kókshetaýda 166 oryndyq «Aıala» balabaqshasy ashyldy, bıyl taǵy 280 oryndyq balabaqsha ashý josparlanyp otyr.
«Inklıýzıvti bilim berý baǵyty oblysta jaqsy damyp keledi. 2025 jyly 30 jańa kabınet ashylady, oǵan 375 mıllıon teńge bólindi. Balalardy tasymaldaýǵa arnalǵan 20 arnaıy avtobýs satyp alyndy», — dep málimdedi Ásemgúl Súleımenova.
Sonymen qatar, 2020 jyldan bastap oblysta aýtızmmen aýyratyn balalardy qoldaý boıynsha memlekettik baǵdarlama iske asyrylýda, osy arqyly 55 bala kómek aldy.
Aıtýynsha, mamandandyrylǵan mekemeler ashýmen qatar, «Erekshe» balalarmen jumys isteıtin mamandardy daıarlaý jáne tartý máselesi de mańyzdy. Bilim berý qyzmetiniń sapasy men túzetý jumystary pedagogterdiń kásibı sheberligine tikeleı baılanysty.
«Qazir bizde 1090 arnaıy pedagog jumys isteıdi. Olar logopedter, defektologtar, tıflopedagogtar, sýrdopedagogtar, olıgofrenopedagogtar jáne psıholog-pedagogtar. Balalar sanynyń ósýi qosymsha resýrstardy talap etedi. Biz joǵary oqý oryndarymen jáne kolledjdermen belsendi jumys isteımiz, pedagogıkalyq jármeńkelerge qatysyp, bilikti mamandardy tartýǵa tyrysamyz. Ár mektep qazirdiń ózinde kadrlyq qajettilikti josparlap, bolashaqta maman tapshylyǵyna tap bolmas úshin jumys isteýi mańyzdy», — dep qorytyndylady spıker.
