ۋكراينا پرەزيدەنتى ۆلاديمير زەلەنسكي رەسەي پرەزيدەنتى ۆلاديمير پۋتينمەن كەلىسسوز جۇرگىزۋ ۋكراينالىقتار ءۇشىن بەيبىتشىلىك ورناتۋدىڭ جالعىز جولى بولسا، وعان دايىن ەكەنىن مالىمدەدى، دەپ حابارلايدى "ادىرنا" ۇلتتىق پورتالى «ۋكراينسكايا پراۆدا» باسىلىمىنا سىلتەمە جاساپ.
«ەگەر بۇل ءبىزدىڭ حالقىمىز ءۇشىن بەيبىتشىلىككە قول جەتكىزۋدىڭ جانە ادامداردى جوعالتپاۋدىڭ جالعىز مۇمكىندىگى بولسا، ارينە، ءبىز بۇعان بارامىز»، – دەدى زەلەنسكي بريتاندىق جۋرناليست پيرس مورگانعا بەرگەن سۇحباتىندا.
سونداي-اق، ول كرەمل باسشىسىنا دەگەن جەكە كوزقاراسى بۇل جاعدايدا ماڭىزدى ەمەس ەكەنىن ايتتى.
«مەن ونى جاۋىم دەپ سانايمىن. ەگەر شىندىقتى ايتسام، ول دا مەنى جاۋ دەپ ەسەپتەيدى» - دەدى ول.
زەلەنسكيدىڭ ايتۋىنشا، ۋكراينا قازىرگى جاعدايدا بارلىق اۋماقتارىن قايتارا المايدى جانە ناتيجەسى بەلگىسىز نارسە ءۇشىن ميلليونداعان ادامدى قۇربان ەتۋگە بولمايدى. سونىمەن قاتار، ول سوعىستا ءومىرىن قيعان ازاماتتارعا بەرگەن انتىن بۇزبايتىنىن جانە كونستيتۋتسيا تالاپتارىن ساقتاي وتىرىپ، باسىپ الىنعان اۋماقتاردى رەسەيدىڭ ءبىر بولىگى رەتىندە مويىندامايتىنىن اتاپ ءوتتى.
ۋكراينا باسشىسى سوعىس جاعدايىندا ەلدە سايلاۋ وتكىزۋ مۇمكىن ەمەستىگىن تاعى دا راستادى.
بۇعان دەيىن ۆلاديمير پۋتين زەلەنسكيدى «زاڭسىز پرەزيدەنت» دەپ اتاپ، 2024 جىلدىڭ مامىرىندا ونىڭ وكىلەتتىك مەرزىمى اياقتالاتىنىن، سوندىقتان بەيبىت كەلىسىمگە قول قويۋعا قۇقىعى جوق ەكەنىن مالىمدەگەن.
