AI مەن روبوتوتەحنيكانى بىرىكتىرۋ سالاسىنداعى كوشباسشى AgiBot كومپانياسى قازاقستاندا روبوتتار ءوندىرىسى مەن AI شەشىمدەرىن ەنگىزۋ كاسىپورنىن قۇرادى. بۇل تۋرالى بۇگىن، 3 اقپاندا تسيفرلىق دامۋ يننوۆاتسيالار جانە اەروعارىش ونەركاسىبى مينيسترلىگى ايتتى، دەپ حابارلايدى «ادىرنا» ءتىلشىسى.
«AgiBot سياقتى وزىق كومپانيامەن سەرىكتەستىك – روبوت جاساۋ سالاسىن دامىتۋ تاريحىنداعى ماڭىزدى كەزەڭ. اسىرەسە، ءبىزدىڭ ارىپتەستىگىمىز قازاقستان اۋماعىندا روبوتتار ءوندىرىسىن لوكاليزاتسيالاۋدى كوزدەيتىنىن ەرەكشە اتاپ وتكىم كەلەدى. بۇل بىزگە ماشينا جاساۋ سالاسىنداعى ەڭ پەرسپەكتيۆالى باعىتتاردىڭ بىرىندە كاسىپورىن اشۋمەن قاتار، ساراپتامالىق تاجىريبەنى ارتتىرۋعا جانە روبوتوتەحنيكا سالاسىنداعى وتاندىق قۇزىرەتتىلىك ورتالىعىن قۇرۋعا مۇمكىندىك بەرەدى»، – دەپ اتاپ ءوتتى تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ.
بىرلەسكەن باستامالاردى قارجىلاندىرۋعا ewpartners جەكە ينۆەستيتسيالىق قورى جانە «Qazaqstan Investment Corporation» اق قاتىسادى دەپ جوسپارلانۋدا.
ايتا كەتەيىك، ءتيىستى كەلىسىمگە «Digital Almaty 2025» فورۋمىندا قول قويىلدى.
2023 جىلدىڭ اقپانىندا نەگىزى قالانعان AgiBot كومپانياسى امبەباپ ادام ءتارىزدى روبوتتاردى ازىرلەۋ جانە وندىرۋمەن اينالىسادى. AgiBot جاساندى ينتەللەكت پەن روبوتوتەحنيكا سالاسىنداعى تەحنولوگيالاردى بەلسەندى دامىتىپ، روبوتتاردى ونەركاسىپتەن باستاپ تۇرمىستىق مىندەتتەرگە دەيىن كەڭ اۋقىمدى قولدانۋ ءۇشىن ازىرلەيدى.
