مەملەكەتتىك گازداندىرۋ باعدارلاماسى اياسىندا تسەلينوگراد اۋدانىنىڭ «نۇرلى» تۇتىنۋشىلار كووپەراتيۆىندە تابيعي گازدى ىسكە قوسۋ ءراسىمى ءوتتى. ەندى 3500-دەن استام تۇرعىن ەكولوگيالىق تازا جانە ەكونوميكالىق ءتيىمدى وتىنعا قول جەتكىزدى.
سالتاناتتى ىسكە قوسۋ راسىمىنە اقمولا وبلىسىنىڭ اكىمى مارات احمەتجانوۆ، «QAZAQGAZ AIMAQ» اق باس ديرەكتورى باۋىرجان اسقاروۆ، دەپۋتاتتار جانە اۋدان جۇرتشىلىعى قاتىستى.
اقمولا وبلىسىنىڭ اكىمى مارات احمەتجانوۆ ءوڭىردى گازداندىرۋ جۇمىستارى بەلسەندى تۇردە جالعاساتىنىن اتاپ ءوتتى:
«حالىقتى تابيعي گازبەن قامتاماسىز ەتۋ – تۇرعىنداردىڭ ءومىر ءسۇرۋ ساپاسىن جاقسارتۋعا جانە ءوڭىر ەكونوميكاسىن قولداۋعا باعىتتالعان ماڭىزدى ينفراقۇرىلىمدىق جوبالاردىڭ ءبىرى. بۇل ماسەلە ەل پرەزيدەنتىنىڭ باقىلاۋىندا. «سارىارقا» ماگيسترالدىق گاز قۇبىرى قۇرىلىسىنىڭ ءى كەزەڭى اياسىندا ارشالى اۋدانىنداعى 17 ەلدى مەكەننىڭ تۇرعىندارىنا گاز بەرىلدى. بۇگىن گاز تسەلينوگراد اۋدانىنا دا كەلدى. 2025 جىلى تسەلينوگراد اۋدانىنىڭ تاعى ءۇش اۋىلىنا – شۇبار، قوياندى، اققايىڭ ەلدى مەكەندەرىنە جانە قوسشى قالاسىنا گاز جەتكىزىلەدى. 835 كم-دەن استام گاز قۇبىرى سالىنىپ، 21 664 ابونەنت تابيعي گازبەن قامتىلادى»، – دەدى مارات احمەتجانوۆ.
«QazaqGaz Aimaq» اق باس ديرەكتورى باۋىرجان اسقاروۆ گازدى پايدالانۋ كەزىندەگى قاۋىپسىزدىكتىڭ ماڭىزدىلىعىنا توقتالدى:
«گاز – بۇل جايلىلىق پەن جىلۋ، بىراق ونى پايدالانۋ جاۋاپكەرشىلىكتى تالاپ ەتەدى. جاڭا تۇتىنۋشىلار ەڭ الدىمەن تۇرمىستا تابيعي گازدى پايدالانۋ ەرەجەلەرىن ۇيرەنۋى، جابدىقتى ۋاقىتىلى تەكسەرىپ، ونىڭ جارامدىلىعىن قاداعالاۋى قاجەت»، – دەدى ب.اسقاروۆ.
العاشقىلاردىڭ ءبىرى بولىپ گازعا قوسىلعان اۋجانوۆتار وتباسى اتقارىلعان جۇمىس ءۇشىن العىس ءبىلدىردى.
«ءبىز گازدى كوپ كۇتتىك. ونىڭ نەبارى جارتى جىل ىشىندە ورناتىلۋىنا كۋا بولدىق. ءبىزدىڭ باستى ماسەلەمىزدىڭ شەشىلۋىنە كومەكتەسكەنى ءۇشىن ەل پرەزيدەنتىنە العىسىمىزدى بىلدىرەمىز»، – دەدى جانۇيا ەگەسى مۇرات اۋجانوۆ.
ەلدى مەكەندى گازداندىرۋ اياسىندا شامامەن 68 كم گاز جەلىسى تارتىلىپ، 7 شكافتىق گاز تاراتۋ ستانتسياسى ورناتىلدى.
ءوڭىردى گازداندىرۋ جۇمىستارى جالعاسىپ، تاعى دا كوپتەگەن ۇيلەر ەكولوگيالىق تازا ءارى ىڭعايلى ەنەرگيا كوزىمەن قامتاماسىز ەتىلەدى.
