اقمولا وبلىستىق كوپسالالى اۋرۋحاناسىندا قازاقستاننىڭ جەتەكشى حيرۋرگتارىنىڭ ءبىرى – پروفەسسور سەرىك يماقۇلى توقپانوۆتىڭ قاتىسۋىمەن شەبەرلىك سىنىبى ءوتتى. قازاقستان رەسپۋبليكاسىنىڭ ەڭبەك سىڭىرگەن قايراتكەرى، «التىن سكالپەل» جانە «التىن لاپاروسكوپ» ماراپاتتارىنىڭ يەگەرى ءوڭىر دارىگەرلەرىمەن ءوز تاجىريبەسىمەن ءبولىستى.
شەبەرلىك سىنىبى اياسىندا پروفەسسور وڭەش تەسىگى جارىعىن لاپاروسكوپيالىق ادىسپەن الىپ تاستاۋ بويىنشا وتا جاسادى. بۇل حيرۋرگيالىق ءادىس 0,5–1,5 سم كولەمىندەگى شاعىن تىلىكتەر ارقىلى وتا جاساۋعا مۇمكىندىك بەرەدى. ناتيجەسىندە ناۋقاستىڭ اعزاسىنا تۇسەتىن جۇكتەمە بارىنشا ازايىپ، ونىڭ تەز جانە جايلى قالپىنا كەلۋىنە جاعداي جاسالادى.
«لاپاروسكوپيا – حيرۋرگياداعى جاڭا دەڭگەي. ناۋقاستار مۇنداي وتالاردى اۋىرسىنۋسىز وتكەرەدى، ال كەلەسى كۇنى وزدىگىنەن قوزعالا الادى. بۇل – مەديتسينانىڭ ۇلكەن جەتىستىگى. اقمولا وبلىستىق كوپسالالى اۋرۋحاناسىندا جوعارى تەحنولوگيالىق وتالاردى جاساۋعا بارلىق جاعداي جاسالعانىنا قۋانىشتىمىن»، – دەدى پروفەسسور توقپانوۆ.
سونىمەن قاتار، شارا بارىسىندا پروفەسسور وڭەش تەسىگى جارىعى مەن گاستروەزوفاگەالدى رەفليۋكس اۋرۋىن ەمدەۋدەگى لاپاروسكوپيالىق حيرۋرگيا تۋرالى ءدارىس وقىدى. سونداي-اق، قاتىسۋشىلار ءوت قابىن قاۋىپسىز الىپ تاستاۋ ماسەلەلەرىن تالقىلادى. وقىتۋعا حيرۋرگتەر، تەراپەۆتەر، نەۆرولوگتار، ەندوسكوپيستەر، ەندوكرينولوگتار جانە ساۋلەلىك دياگنوستيكا دارىگەرلەرى قاتىستى.
مۇنداي شەبەرلىك سىنىپتارى وزىق مەديتسينالىق تەحنولوگيالاردى ەنگىزۋگە، دارىگەرلەردىڭ بىلىكتىلىگىن ارتتىرۋعا جانە ەڭ باستىسى – ناۋقاستارعا كورسەتىلەتىن مەديتسينالىق كومەكتىڭ ساپاسىن جاقسارتۋعا ىقپال ەتەدى. وڭىردە جوعارى تەحنولوگيالىق حيرۋرگيانى دامىتۋ – مەديتسينا سالاسى ءۇشىن ۇلكەن قادام عانا ەمەس، سونىمەن قاتار اقمولا وبلىسى تۇرعىندارىنىڭ دەنساۋلىعى مەن ءال-اۋقاتىنا قوسىلعان ماڭىزدى ۇلەس.
سونىمەن بىرگە، سەرىك توقپانوۆ ءوزىنىڭ شىعارماشىلىعىمەن دە تانىمال. وسى رەتتە، 2025 جىلعى 3 اقپاندا ساعات 18:15-تە كوكشەتاۋداعى ۇكiلi ىبىراي اتىنداعى اقمولا وبلىستىق فيلارمونياسىندا «وتكەن جىلدارداعى ۇمىتىلماس اندەر» اتتى جەكە كونتسەرت وتەدى. كونتسەرتتىڭ اۆتورى – قازاقستان رەسپۋبليكاسىنىڭ ەڭبەك سىڭىرگەن قايراتكەرى، مەديتسينا عىلىمدارىنىڭ دوكتورى، پروفەسسور، كسرو جانە رەسپۋبليكالىق بايقاۋلاردىڭ لاۋرەاتى سەرىك يماقۇلى توقپانوۆ.
كەش بارىسىندا اقمولا وبلىستىق فيلارمونياسىنىڭ وركەسترىنىڭ سۇيەمەلدەۋىمەن وتكەن جىلداردىڭ ەڭ ۇزدىك اندەرى ورىندالادى. اسەم داۋىس، جۇرەككە جىلى اۋەندەر مەن جاندى مۋزىكا كورەرمەندەرگە شىنايى ەموتسيا مەن ۇمىتىلماس اسەر سىيلايدى.
