ۇلتتىق كينونى قولداۋ ورتالىعى ەلىمىزدىڭ تۇكپىر-تۇكپىرىندە قازاق كينوسىنىڭ ون كۇندىگىن وتكىزەتىنىن حابارلايدى. شارا اياسىندا كورەرمەندەرگە قر مادەنيەت جانە اقپارات مينيسترلىگىنىڭ، سونداي-اق كينو ورتالىعىنىڭ قولداۋىمەن تۇسىرىلگەن بىرقاتار فيلمدەر ۇسىنىلادى. العاشقى كورسەتىلىم قاراعاندى وبلىسىن قامتىماق، سودان سوڭ شارا وزگە قالالار مەن اۋىلدىق وكرۋگتەردە دە ۇيىمداستىرىلادى. باستامانىڭ باستى ماقساتى – وتاندىق كينونىڭ كوكجيەگىن كەڭەيتىپ، قازاقستاندىق كينوگەرلەردىڭ جەتىستىگىمەن تانىستىرۋ.
قازاق كينوسىنىڭ كۇندەرى اياسىندا كورەرمەندەر وزەكتى تاقىرىپتاردى قاۋزاپ، ەل تاريحى مەن مادەنيەتىن ايشىقتايتىن فيلمدەردى تەگىن تاماشالاي الادى. وسىلايشا، شالعاي اۋىلدىڭ تۇرعىندارى بۇگىنگى قازاق كينەماتوگرافياسىنىڭ ۇزدىك تۋىندىلارىمەن قاۋىشپاق.
«كورسەتىلىمدى قاراعاندى وبلىسىنان باستاۋىمىزدىڭ وزىندىك سىرى بار. بۇل ايماق ءوندىرىستىڭ قايناعان ورتاسىندا ورنالاسقان. بيىلعى جىلدى پرەزيدەنتىمىز قاسىم-جومارت توقاەۆ جۇمىسشى ماماندىقتار جىلى دەپ جاريالاعانى بەلگىلى. سول سەبەپتى دە اۋقىمدى شارانى وسى ايماقتان باستاۋىمىزدىڭ سيمۆوليكالىق ءمانى بار. قاراعاندىدان باستاپ، ەلىمىزدىڭ ءار بۇرىشىندا قازاق كينوسىنىڭ كۇندەرىن وتكىزۋ وتاندىق كينەماتوگرافيانى ىلگەرىلەتۋگە سەرپىن سىيلايدى دەپ بىلەمىز. سەبەبى ءاربىر ءفيلمنىڭ ەڭ باستى جەڭىسى – ونىڭ ءوز كورەرمەنىن تابۋى. ءبىزدىڭ ماقساتىمىز دا ۇلتتىق كينونى حالىققا قولجەتىمدى ەتۋ»، – دەدى باسقارما توراعاسىنىڭ كينوجوبالار مونيتورينگى جونىندەگى ورىنباسارى ادىلەت وماروۆ.
ايتا كەتەيىك، بۇعان دەيىن كينو ورتالىعىنىڭ قولداۋىمەن 117 كارتينانىڭ ءوندىرىسى اياقتالدى. ونىڭ 72-ءسى – كوركەم، 37-ءسى – دەرەكتى، 8-ءى – انيماتسيالىق فيلمدەر. پروكاتقا شىققان تۋىندىلار دا ارتىپ جاتىر.
«ماسەلەن، كينو كۇندەرى اياسىندا كورسەتىلەتىن «قاجىمۇقان» ۇلتتىق رۋحىمىزدى اسقاقتاتسا، «جامبىل. جاڭا ءداۋىر»، «دوس-مۇقاسان» فيلمدەرى ارقىلى تۇلعالارىمىزدىڭ ءجۇرىپ وتكەن جولىنا قانىعاسىزدار. «وپەراتسيا نابات»، «ۆرەميا پاتريوتوۆ» قۇقىق قورعاۋشىلارىمىزدىڭ ەڭبەگىن پاش ەتىپ، وتانعا دەگەن سۇيىسپەنشىلىكتى ارتتىرادى. «بوكسەر» ءفيلمىنىڭ باستى ءپروتوتيپى وزدەرىڭىز جەرلەستەرىڭىز سەرىك ساپيەۆ ەكەنىن دە ايتا كەتۋ كەرەك. «باۋىرىنا سالۋ» دەپ اتالاتىن كينودا ءداستۇرىمىز دارىپتەلەدى. كىشكەنتاي كورەرمەندەرگە ارنالعان «تايقازان» دەپ اتالاتىن انيماتسيالىق فيلم دە نازارلارىڭىزعا ۇسىنىلادى. «الماتى، يا ليۋبليۋ تەبيا!»، «سوڭعى ۇكىم»، «دالا قاسقىرى»، «ستوپ، نوچ»، «شۋلاما» فيلمدەرىنىڭ دە ايتار ويى بار. بيىل تاعى وننان اسا تۋىندى پروكاتقا شىعادى دەپ جوسپارلانۋدا»، – دەدى باسقارما توراعاسىنىڭ كينوجوبالار مونيتورينگى جونىندەگى ورىنباسارى ادىلەت وماروۆ.
