قازاقستان لوندوننان ايسۇلتاندى دەپورتاتسيالاۋدى سۇرادى

3216
Adyrna.kz Telegram

لوندون پوليتسياسى بۇزاقىلىق جاسادى دەپ ايىپتاعان ايسۇلتان نازارباەۆ ءىسى تۋرالى جاڭا دەرەك جاريالادى. بريتانيالىق Mail Online سايتىنىڭ جازۋىنا قاراعاندا، «ماۋسىمنىڭ 5-ىندە لوندون ورتالىعىنداعى Covent Garden-دەگى بوگدە ادامنىڭ پاتەرىندە ۇستالعان 29 جاستاعى ايسۇلتان نازارباەۆ پوليتسيا قىزمەتكەرى روسس سەمبرۋكتىڭ قولىن قاتتى تىستەپ العان. وفيتسەردىڭ قولىندا قان ءىزى قالعان دەپ مالىمدەدى ساۋزۋورك كورولدىك سوتى”.

پروكۋرور گرەگور ماككينليدىڭ ايتۋىنشا، نازارباەۆ تاۆيستوك كوشەسىندەگى پاتەردە ۇستالعان. «وندا پوليتسيا قىزمەتكەرلەرىمەن توبەلەس بولىپ، وفيتسەرلەردىڭ ءبىرى قاتتى جاراقات العان». ماككينليدىڭ ايتۋىنشا، پوليتسيا نازارباەۆ پاتەرگە ۇرلىققا ءتۇستى دەپ ويلاعان.

بۇنىڭ الدىندا ەكى كۇن بۇرىن عانا International Park Plaza قوناقۇيىنە شاقىرىلعان پوليتسەيلەردى ايسۇلتان نازارباەۆ بالكوننان سەكىرەمىن دەپ قورقىتقان.

پروكۋروردىڭ ايتۋىنشا، ەندى قازاقستاننىڭ رەسمي ورىندارى لوندون قالالىق پوليتسياسىمەن بايلانىسىپ، ونى «جاي عانا دەپورتاتسيالاۋدى» سۇراپ وتىر.

ايسۇلتان نازارباەۆتىڭ قورعاۋشىسى اليسدار ۋيليامسوننىڭ ايتۋىنشا، قازاقستان ۇكىمەتى تەرگەۋشىلەرمەن ىنتىماقتاسىپ كەلەدى جانە ولار «بريتانيا بيلىگى پاسپورتىن تارتىپ العان سوڭ نازارباەۆقا جاڭا پاسپورت بەرمەيتىنىن ايتقان».

«بۇل - ءبىر تۇسىنىكسىز جاعداي. پوليتسەيلەر كەلگەندە ايىپتالۋشى پاتەردە بولعان. پاتەردەن ەشتەڭە ۇرلانباعان، بىراق (پاتەرگە) ازداعان زاقىم كەلگەن، شىعىن سوماسى 5 مىڭ فۋنت شاماسىندا دەپ ايتىلدى» دەيدى ۋيليامسون.

سۋديا مارتين بەددوي 29 جاستاعى جىگىتتى كەپىلدىكپەن بوساتۋدان باس تارتىپ، ونىڭ Priory Hospital اۋرۋحاناسىندا ەسىرتكىگە تاۋەلدىلىكتەن ەمدەتۋ جونىندە ۇيعارىمعا كەلگەن.

«بۇل جاعداي ەسىرتكىنىڭ اسەرىنەن بولدى دەپ ايتۋعا تولىق نەگىز بار دەپ ويلايمىن. ايىپتالۋشىنىڭ ءحالى وتە ناشار بولعان. بۇل ايىپتالۋشىنىڭ ا ساناتىنداعى ەسىرتكىنى قولدانۋىنا وراي اۋىر پروبلەماسى بار» دەگەن سۋديا.

باسىلىمنىڭ جازۋىنشا، «ايسۇلتان نازارباەۆ شابۋىل جاساعانىن، ادام دەنساۋلىعىنا زيان كەلتىرگەنىن جانە مۇلىكتى بۇلدىرگەنىن مويىنداعان. ەندى ول قازاننىڭ 18-ءى كۇنى ۇكىمدى ەستۋگە سوتقا اكەلىنبەك».

"ازاتتىق" راديوسى

پىكىرلەر