2025 جىلى ۇيعىر اۋدانىندا بارلىق ەلدى مەكەندەرىن گازداندىرۋ جۇمىستارى جۇرگىزىلەدى، دەپ حابارلايدى alataunews.kz. بۇل تۋرالى ۇيعىر اۋدانىنىڭ اكىمى بوتا سەرىكقىزى ەلەۋسىزوۆا الماتى وبلىسىنىڭ وڭىرلىك كوممۋنيكاتسيا قىزمەتىنىڭ الاڭىندا وتكەن ءباسپاسوز-ءماسليحاتىندا مالىمدەدى.
اۋدان ورتالىعى شونجى اۋىلىندا 2 815 جەكە تۇلعا جانە 126 زاڭدى تۇلعا ورتالىقتاندىرىلعان گازعا قوسىلدى. سونىمەن قاتار، الەۋمەتتىك وبەكتىلەردى دە تابيعي گازعا قوسۋ جۇمىستارى قارقىندى جۇرگىزىلۋدە. اتاپ ايتساق، اۋدان اكىمدىگىنىڭ ەكى عيماراتى 2024 جىلدىڭ جەلتوقسان ايىندا گازبەن قامتاماسىز ەتىلسە، شونجى اۋىلىنداعى №1 جانە №5 ورتا مەكتەپتەرى وسى جىلدىڭ اقپان ايىندا گازعا قوسىلماق.
قازىرگى ۋاقىتتا، تاعى دا ءۇش اۋىلدى گازداندىرۋ جۇمىستارى قارقىندى ءجۇرىپ جاتىر. تاسقاراسۋ اۋىلىنا 504,0 ملن.تەڭگە قاراستىرىلىپ قۇرىلىس مونتاج جۇمىستارى 90 پايىزعا، باحار اۋىلىنا 223,0 ملن.تەڭگە قاراجات ءبولىنىپ، قۇرىلىس مونتاج جۇمىستارى 95 پايىزعا اياقتالدى. (مەردىگەر «رەمستروي» جشس-ءى). ال شارىن اۋىلىن گازداندىرۋعا 1,6 ملرد. تەڭگە قاراجات ءبولىنىپ، ءتيىستى جۇمىستار اياقتالىپ ادىلەت باسقارماسىنا تىركەلۋدە (مەردىگەر «مبك كۋرىلىس»).
اتالعان جوبالار 2025 جىلدىڭ ءبىرىنشى جارتىجىلدىعىندا اياقتالادى دەپ جوسپارلانىپ وتىر.
سونىمەن قاتار، تاۋلى ايماقتا ورنالاسقان ەلدى مەكەندەردى تابيعي گاز قۇبىرىنا قوسۋ ماقساتىندا اۆتوماتتاندىرىلعان گاز تاراتۋ ستانساسىن سالۋعا جوبالىق سمەتالىق قۇجاتتاما دايارلاۋعا 136,9 ملن تەنگە قاراجات ءبولىندى. 1 كەزەڭدە كىشى ديحان، ۇلكەن ديحان، قالجات، كەتپەن اۋىلدارىنا گاز قۇبىرىن تارتۋ كوزدەلدى. قالعان ەلدى مەكەندەردى گازداندىرۋ كەزەڭ كەزەڭىمەن جۇزەگە اسىرىلادى.
سونىمەن قاتار شونجى اۋىلىنداعى كوپ قاباتتى تۇرعىن ۇيلەردى جىلۋمەن جابدىقتاۋعا ارنالعان اۆتونومدى بلوكتى-ءمودۋلدى قازاندىق سالۋعا- 135,0 ملن تەنگە قاراجات ءبولىندى.