الماتى قالاسىندا بۇرىنعى پوليتسيا قىزمەتكەرى دارمەن شىنىبەكوۆ ادىلدىك ىزدەپ، جوعارى كەرنەۋلى ەلەكتر باعاناسىنا شىعىپ، نارازىلىق ءبىلدىردى، دەپ حابارلايدى "ادىرنا" ۇلتتىق پورتالى كتك تەلەارناسىنا سىلتەمە جاساپ.
ول سەگىز جىلدان بەرى قانداي بۇيرىق نەگىزىندە جۇمىستان قۋىلعانىن بىلە الماي جۇرگەنىن ايتادى. پودپولكوۆنيك بۇل ارەكەتكە باسقا امالى قالماعاندىقتان بارعانىن ءتۇسىندىردى.
شىنىبەكوۆتىڭ ايتۋىنشا، ول قاتارداعى قىزمەتكەر ەمەس، ءبولىم باستىعىنىڭ ورىنباسارى لاۋازىمىندا بولعان. پودپولكوۆنيك شەنىنە جەتكەن كەزدە قىزمەت ءتارتىبىن بۇزدى دەگەن ايىپپەن جۇمىستان شىعارىلعان. سوت شەشىمىندە ونىڭ جول ەرەجەسىن بۇزعاندارعا ايىپپۇل تۇبىرتەكتەرىن بەرگەنى، ال ول ايىپپۇلداردىڭ جالپى سوماسى 618 مىڭ تەڭگە بيۋدجەتكە تۇسپەي قالعانى كورسەتىلگەن. الايدا، ەكس-پوليتسەي بۇل جاعدايعا قاتىسى جوق ەكەنىن، جالعان تۇبىرتەكتەر تۋرالى بىلمەگەنىن العا تارتادى.
ء"ۇش سوت ءوتتى. ءۇش سوتتىڭ شەشىمىندە مەنىڭ كىنام تۋرالى ءبىر دالەل جوق. مەندە زاڭسىز جۇمىستان قۋىلعانىمدى راستايتىن جازباشا قۇجات بار. بىراق 8 جىل بويى ادىلەتتىلىككە قول جەتكىزە الماي كەلەمىن. نە مينيسترگە، نە جوعارعى سوتقا جولىعۋ مۇمكىن بولمادى", – دەيدى ول.
الماتى مامانداندىرىلعان اۋدانارالىق اكىمشىلىك سوتىنىڭ حابارلاماسىنا سايكەس، شىنىبەكوۆتىڭ پوليتسيا دەپارتامەنتىنە قارسى تالاپ-ارىزى قاناعاتتاندىرىلمادى. سوت ونىڭ قىزمەتىنەن بوساتىلۋىنا №2 المالى اۋداندىق سوتىنىڭ 2017 جىلعى شەشىمى نەگىز بولعانىن جانە بۇل شەشىمنىڭ زاڭدى كۇشىنە ەنگەنىن انىقتادى.
ەكس-پوليتسەي ناقتى قانداي بۇيرىق نەگىزىندە جۇمىستان شىعارىلعانىن بىلگىسى كەلەدى. ول بۇل قۇجاتقا قول جەتكىزۋ ءۇشىن سوتقا شاعىمدانعان، بىراق ءوتىنىشى قابىلدانباعان.
دارمەن شىنىبەكوۆ قىزمەتىنە قايتا ورالۋدى جانە زاڭسىز جۇمىستان شىعارىلعانىن دالەلدەۋدى كوزدەيدى.
