قازاقستان پرەزيدەنتى قاسىم-جومارت توقاەۆتىڭ توراعالىعىمەن ۇكىمەتتىڭ كەڭەيتىلگەن وتىرىسى باستالدى، دەپ حابارلايدى “ادىرنا” ۇلتتىق پورتالى.
اقوردا مالىمەتىنشە، وتىرىستا ەلىمىزدىڭ 2024 جىلعى الەۋمەتتىك-ەكونوميكالىق دامۋىنىڭ قورىتىندىلارى شىعارىلىپ، ۇكىمەتتىڭ الداعى كەزەڭگە ارنالعان نەگىزگى مىندەتتەرى بەلگىلەنەدى.
بىلتىرعى جۇمىستىڭ قورىتىندىسىن پرەمەر-مينيستر ولجاس بەكتەنوۆ، ۇلتتىق بانك توراعاسى تيمۋر سۇلەيمەنوۆ جانە بىرقاتار ءوڭىردىڭ اكىمدەرى باياندايدى دەپ جوسپارلانعان.
"بۇگىن ءبىز ۇكىمەتتىڭ كەڭەيتىلگەن وتىرىسىندا وتە وزەكتى ماسەلەلەرگە توقتالامىز. سەبەپ – بارىمىزگە بەلگىلى. قازىر دۇنيە ءجۇزى تۇبەگەيلى وزگەرىسكە ۇشىراپ جاتىر. جاھاندىق ۇدەرىستەر، ەڭ الدىمەن، ەلىمىزدىڭ ەكونوميكالىق احۋالىنا اسەرىن تيگىزەتىنى انىق. جاپپاي تسيفرلاندىرۋ ءداۋىرى، ياعني جاڭا تەحنولوگيالىق كەزەڭ باستالدى. كۇللى الەم مۇلدەم باسقا جاعدايدا ءومىر سۇرەدى. ءبىز سوعان مىندەتتى تۇردە دايىن بولۋىمىز كەرەك. جاڭا تەحنولوگيالىق احۋالعا ساقاداي ساي تۇرۋىمىز قاجەت. بۇل – ەلىمىزدىڭ باسەكەگە قابىلەتىن ارتتىرىپ، تۇراقتى دامۋىنا جول اشاتىن اسا ماڭىزدى فاكتور", - دەدى توقاەۆ.
پرەزيدەنتتىڭ ايتۋىنشا، ۇكىمەت پەن اكىمدەردىڭ جۇمىسى قانشالىقتى ءتيىمدى ەكەنى الدىمەن ەكونوميكانىڭ دامۋ كورسەتكىشتەرى مەن ازاماتتاردىڭ تۇرمىس ساپاسىنا قاراي باعالانادى.
كۇن تارتىبىنە سايكەس، جيىندا پرەمەر-مينيستر ولجاس بەكتەنوۆ، پرەمەر-ءمينيستردىڭ ورىنباسارى سەرىك جۇمانعارين، ۇلتتىق بانك توراعاسى تيمۋر سۇلەيمەنوۆ، "سامۇرىق-قازىنا" اق باسقارما توراعاسى نۇرلان جاقىپوۆ، استانا قالاسىنىڭ اكىمى جەڭىس قاسىمبەك، شىمكەنت قالاسىنىڭ باسشىسى عابيت سىزدىقبەكوۆ، قىزىلوردا وبلىسىنىڭ اكىمى نۇرلىبەك نالىباەۆ بايانداما جاسايدى.
