الماتى، تاراز قالالارى مەن الماتى وبلىسىندا قاڭتار وقيعاسى كەزىندە ۇرلانعان قارۋ-جاراقتار تاركىلەندى. بۇل تۋرالى بۇگىن، 27 قاڭتاردا ءىىم ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
رەسمي مالىمەتتەرگە سۇيەنسەك، جىل باسىنان بەرى جەدەل-ىزدەستىرۋ ءىس-شارالارىن جۇرگىزۋ بارىسىندا 20 اتىس جانە تراۆماتيكالىق قارۋ، ونىڭ ىشىندە 4-ءۋى قاڭتار وقيعاسى كەزىندە جوعالعان، سونداي-اق 6 گراناتا جانە 150-دەن استام ءارتۇرلى كاليبرلى وق-ءدارى تابىلعان.
ءىىم ۇيىمداسقان قىلمىسقا قارسى كۇرەس دەپارتامەنتىنىڭ وكىلى قۋاندىق الپىس بۇل باعىتتاعى جۇمىستار مينيسترلىكتىڭ ەرەكشە باقىلاۋىندا ەكەنىن مالىمدەدى.
«الماتى قالاسىندا 3 شولاق مىلتىق، 3 تاپانشا، 4 گراناتا، شامامەن 50 پاترون، سونىمەن قاتار قاڭتار وقيعاسى كەزىندە قارۋ-جاراق دۇكەنىنەن ۇرلانعان كارابين تاركىلەندى. ال تارازدا 2 شولاق مىلتىق پەن جاۋىنگەرلىك اربالەت تابىلدى. اقتوبەدە 56 پاترونى بار توز ۆينتوۆكاسى مەن ف-1 گراناتاسى تاركىلەندى. الماتى وبلىسىندا 2 قارۋ، رگد-5 گراناتاسى جانە كالاشنيكوۆ اۆتوماتىنىڭ 20 پاترونى، سونداي-اق قاڭتار وقيعاسى كەزىندە ۇرلانعان 2 ماكاروۆ تاپانشاسى تابىلدى»،—دەلىنگەن حابارلامادا.
