قازاقستاندىق "Higgsfield AI" جاساندى ينتەللەكت كومپانياسى Google نۇسقاسى بويىنشا الەمدەگى ۇزدىك 25 ستارتاپ قاتارىنا كىردى، دەپ حابارلايدى "ادىرنا" ۇلتتىق پورتالى BAQ.KZ - كە سىلتەمە جاساپ.
"Higgsfield AI" كومپانياسىنىڭ نەگىزگى ماقساتى — وزىق تەحنولوگيالاردى ازىرلەپ، قازاقستاننىڭ جاھاندىق ەكونوميكاداعى پوزيتسيالارىن نىعايتۋ.
"Higgsfield AI" كومانداسىندا 22 جوعارى بىلىكتى AI-ينجەنەر ەڭبەك ەتەدى. ولاردىڭ اراسىندا حالىقارالىق فيزيكا جانە ماتەماتيكا وليمپيادالارىنىڭ 6 جەڭىمپازى بار. ەرەكشە اتاپ وتەرلىگى، ادەتتە وسىنداي ماماندار شەتەلگە كەتىپ جاتسا، بۇل كوماندا قازاقستان يگىلىگى ءۇشىن جۇمىس ىستەۋدى تاڭداعان.
كومپانيانىڭ سۋپەركومپيۋتەرى 512 GPU NVIDIA پروتسەسسورىمەن جابدىقتالعان جانە 9 پەتابايت كولەمىندەگى دەرەكتەر جيىنتىعىندا نەيروجەلىلەردى وقىتادى. 9 اي ىشىندە كومپانيا ەكى جاڭا ءونىم ازىرلەپ، ولار حالىقارالىق دەڭگەيدە مويىندالدى. بۇل "Higgsfield AI"-گە Google نۇسقاسى بويىنشا الەمدەگى ۇزدىك 25 ستارتاپ قاتارىنا ەنۋگە مۇمكىندىك بەردى.
كومپانيا ازىرلەگەن ەكى نەگىزگى ءونىم بار. ءبىرىنشىسى - ءموبيلدى كونتەنت ستۋدياسى. ول - بەينە جانە ماتىندەر جاساۋ پروتسەسىن جەڭىلدەتۋگە ارنالعان قۇرال. ەكىنشىسى، Diffuse قوسىمشاسى — ءماتىندى بەينەگە اينالدىرۋعا مۇمكىندىك بەرەتىن ارنايى مودەل. Diffuse كومەگىمەن بەينەلەردى نولدەن باستاپ جاساۋعا نەمەسە سەلفي نەگىزىندە بەينەبايان قۇراستىرۋعا بولادى.
بۇل ونىمدەر قازاقستاننىڭ جاساندى ينتەللەكت سالاسىنداعى الەۋەتىن دالەلدەيدى. قازىرگى ۋاقىتتا كومپانيانىڭ ونىمدەرىن 2 ميلليوننان استام قولدانۋشى پايدالانىپ وتىر.
"Higgsfield AI" كومپانياسى AI-ۇيىمداردىڭ الەمدىك رەيتينگىندە توپ-185 قاتارىنا ەندى. كومپانيانىڭ باس ديرەكتورى ەرزات دۋلاتتىڭ ايتۋىنشا، قازاقستان جاساندى ينتەللەكتتىڭ مۇمكىندىكتەرىن پايدالانىپ، ونى الەمدىك ەكونوميكاعا قوسقان ۇلەسىنە اينالدىرۋى ءتيىس.
"جاپونيا مەن كورەيا XX عاسىرداعى تەحنولوگيالىق يننوۆاتسيالاردا ءوز ورنىن تاپقانداي، قازاقستان دا جاساندى ينتەللەكت ارقىلى ءوز ورنىن ايقىنداۋى كەرەك", — دەيدى ەرزات دۋلات.
