وزبەكستان بيلىگى 2024 جىلى شەتەلدە قايتىس بولعان 483 ەڭبەك ميگرانتىنىڭ دەنەسىن وتانىنا جەتكىزدى. بۇل ستاتيستيكالىق مالىمەتتەر رەسپۋبليكانىڭ ۇكىمەتى جانىنداعى ميگراتسيا اگەنتتىگى وكىلدەرىنىڭ قاتىسۋىمەن وتكەن ءباسپاسوز ءماسليحاتىندا جاريالاندى، دەپ حابارلايدى “ادىرنا” ۇلتتىق پورتالى.
«گازەتا.uz» اگەنتتىگىنىڭ مالىمەتىنشە، وسى كەزەڭدە شەتەلدە قايتىس بولعان بارلىق وزبەكستاندىقتار باسقا ەلدەردە زاڭدى تۇردە جۇمىس ىستەگەن. ميگرانتتاردىڭ دەنەلەرىنىڭ باسىم بولىگى، ياعني 474-ءى رەسەيدەن جەتكىزىلگەن. سونىمەن قاتار، تۇركيادان بەس، وڭتۇستىك كورەيا مەن قازاقستاننان ءتورت رەت ءمايىت تاسىمالدانعان.
ميگراتسيا اگەنتتىگىنىڭ باسقارما باستىعى نيگورا يسرويلوۆا تاسىمالداۋ شىعىندارىنىڭ تولىعىمەن رەسپۋبليكانىڭ مەملەكەتتىك بيۋدجەتى ەسەبىنەن جابىلاتىنىن ناقتىلادى. ونىڭ ايتۋىنشا، تاسىمال شىعىنى ەلگە بايلانىستى ءارتۇرلى بولعان. مىسالى، رەسەيدەن ۇشىپ كەلۋ 1000 دوللاردان تومەن بولسا، ۇلىبريتانيادان — 4000-5000 دوللار، وڭتۇستىك كورەيا مەن جاپونيادان شامامەن 9000 دوللار تۇرادى.
ءباسپاسوز ءماسليحاتىندا ايتىلعانداي، وتكەن جىلى وزبەكستان شەتەلدە قيىن جاعدايعا تاپ بولعان ازاماتتارىن ەلگە قايتارۋ جۇمىستارىن جۇرگىزگەن. وسىلايشا، بيلىك شەتەلدە قيىن جاعدايعا تاپ بولعان 775 ميگرانتتى جانە اۋىر جاراقات العان 182 ادامدى ەلگە اكەلگەن.
2024 جىلى رەسەيگە جۇمىس ىستەۋگە بارعان شەتەلدىكتەردىڭ قايتىس بولۋىنا كەي وقيعالار دا اسەر ەتتى. ماسەلەن، مامىر ايىندا ماسكەۋ وبلىسىندا وزبەكستاندىقتار تۇراتىن حوستەلدە ءورت شىعىپ، سەگىز ادامنىڭ ءومىرى قيىلدى.
