20 قاڭتاردا دونالد ترامپ اقش-تىڭ 47-پرەزيدەنتى رەتىندە رەسمي تۇردە قىزمەتىنە كىرىستى، دەپ حابارلايدى «ادىرنا» ءتىلشىسى.
ول ءداستۇر بويىنشا ارنايى وتكەن ۇلىقتاۋ راسىمىندە پرەزيدەنتتىڭ مىندەتتەرىن ادال ورىنداۋعا جانە ەل كونستيتۋتسياسىن قورعاۋعا انت بەردى.
«سالتاناتتى تۇردە پرەزيدەنت مىندەتتەرىن ادال ورىنداۋعا جانە اقش كونستيتۋتسياسىن ساقتاۋعا، قورعاۋعا انت ەتەمىن. ماعان قۇداي جار بولسىن!»—دەدى ول.
سونداي-اق باسشى ءوز سوزىندە ءدال قازىر امەريكانىڭ التىن عاسىرى باستالىپ جاتقانىن اتاپ ءوتتى.
"اقش-تىڭ التىن عاسىرى ءدال قازىر باستالدى. ءبىز بۇگىننەن باستاپ ءبىز گۇلدەنەمىز، بارلىعى بىزگە قىزعانا قارايتىن بولادى" دەگەن دونالد ترامپ پرەزيدەنت رەتىندە سويلەگەن العاشقى سوزىندە. ول مەكسيكامەن شەكارادا توتەنشە جاعداي جاريالاپ، ەلدى "باسقىنشىلاردان قورعايتىنىن" باسا ايتقان.
"تاريحي جارلىقتار" شىعاراتىنىن بىلدىرگەن ول فەدەرالدىق دەڭگەيدە ءولىم جازاسىن قايتا ەنگىزەتىنىن جاريالادى. بۇعان قوسا رەسمي تۇردە تەك ەكى جىنىستى عانا مويىندايتىنىن مالىمدەدى.
"مەكسيكا بۇعازىنىڭ اتاۋىن "امەريكا بۇعازى" دەپ وزگەرتەمىز" دەگەن ول "پاناما كانالىن قايتارامىز", "اقش تۋىن مارسقا تىگەمىز" دەپ ءبىر توقتادى. ترامپ اقش اسكەرىنىڭ كۇشى سوعىستاعى جەڭىستەرمەن عانا ەمەس، "سوعىستاردى الدىن العانىمەن" ولشەنەدى دەگەندى اتاپ كورسەتكەن.
"ەگەمەندىگىمىزدى قايتارىپ، قاۋىپسىزدىگىمىزدى نىعايتامىز. امەريكا تاريحتا بولماعان دەڭگەيدە ۇلى ەلگە اينالادى. امەريكانىڭ قۇلدىراۋى توقتايدى" دەگەن ترامپ.
ترامپ بىلتىر وزىنە جاسالعان قاستاندىقتى دا ەسكە سالىپ، "امەريكانى قايتا ۇلى ەلگە اينالدىرۋ ءۇشىن ءوزىن قۇداي ساقتاپ قالعانىن" ايتتى. ول ينفلياتسيانى ازايتىپ، باعا ءوسىمىن توقتاتۋعا ۋادە بەردى. اقش پرەزيدەنتى ۇكىمەت جۇمىسىنىڭ تيىمدىلىگىن قامتاماسىز ەتەتىن جاڭا مينيسترلىك قۇرىلاتىنىن دا ايتقان.
ۆاشينگتوندا وتكەن يناۋگۋراتسياعا ترامپتىڭ جاقىندارى – جۇبايى مەن بالالارى قاتىستى. سونداي-اق ەكس-پرەزيدەنت دجو بايدەن، بۇرىنعى ۆيتسە-پرەزيدەنت كامالا حارريس، بۇرىنعى پرەزيدەنتتەر باراك وباما (2009-2017), بيلل كلينتون (1993-2001), كىشى دجوردج بۋش (2001-2009) جانە ەكس-مەملەكەتتىك حاتشى حيللاري كلينتون دا كەلدى. الەمگە ايگىلى بيزنەسمەن يلون ماسك تا سالتاناتتى جيىننىڭ قۇرمەتتى قوناقتارى قاتارىندا بولدى.
اقش كونستيتۋتسياسى بويىنشا، بۇرىنعى پرەزيدەنتتىڭ قىزمەتى 20 قاڭتاردا ۆاشينگتون ۋاقىتىمەن ساعات تۇسكى 12:00-دە اياقتالىپ، سول ۋاقىتتا جاڭا پرەزيدەنت قىزمەتىنە كىرىسەدى. ترامپ بۇل جولى ەكىنشى رەت پرەزيدەنتتىككە انت بەردى. ول 2017-2021 جىلدارى اقش-تىڭ 45-ءشى پرەزيدەنتى مىندەتىن اتقارعان ەدى. سوندا ول "امەريكانىڭ ۇلىلىعىن قايتارامىز" دەپ ۇرانداعان بولاتىن.
