مەملەكەت باسشىسى قاسىم-جومارت توقاەۆ قازاقستاننىڭ حالىق جازۋشىسى، دراماتۋرگ، قوعام قايراتكەرى تولەن ابدىككە «ەگەمەن قازاقستان» گازەتىندە جاريالانعان سۇقباتىنا وراي جەدەلحات جولدادى. بۇل تۋرالى بۇگىن، 20 قاڭتاردا اقوردانىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
«ەگەمەن قازاقستان» گازەتىنە بەرگەن سۇقباتىڭىزدى مۇقيات وقىپ شىقتىم. وزەكتى وي-تولعامدارىڭىز ارقىلى ۇلت رۋحانياتى ءۇشىن قۇندى دۇنيەلەر ايتىلعان. ءتول ادەبيەتىمىزدىڭ دامۋ كوكجيەگىنە قاتىستى سىن-پىكىرلەرىڭىز بەن جاس بۋىنعا قاراتا ايتقان اقىل-كەڭەستەرىڭىز ورىندى دەپ سانايمىن. شىن مانىندە، جاھاندى جايلاعان قازىرگىدەي قۇبىلمالى زاماندا جازۋشىلار قاۋىمى كوركەم تۋىندىلارى ارقىلى ادىلدىك، جاقسىلىق جانە ادامدىق قۇندىلىقتارىن كەڭىنەن دارىپتەگەنى ءجون. بۇل ەلىمىزدىڭ كەلەشەگى ءۇشىن وتە ماڭىزدى. قالامىڭىز قارىمدى بولسىن! سىزگە مىقتى دەنساۋلىق، باق-بەرەكە جانە تولايىم تابىس تىلەيمىن!»— دەلىنگەن جەدەلحاتتا.
ەسكە سالايىق، 10 قاڭتاردا قازىرگى قازاق ادەبيەتىنىڭ ءىرى وكىلى، «پاراسات مايدانى»، «توزاق وتتارى جىمىڭدايدى» «وڭ قول»، «اقيقات»، «ءولىارا» سىندى كلاسسيكالىق تۋىندىلاردىڭ اۆتورى، جازۋشى تولەن ابدىكتىڭ جۋرناليست قانات ابىلقايىرعا بەرگەن سۇقباتى «ەگەمەن قازاقستان» گازەتىندە جاريالانعان ەدى.
جازۋشى اڭگىمە بارىسىندا قازىرگى قازاق ادەبيەتىنىڭ جاي-كۇيىنە توقتالدى.
«قازاق ادەبيەتىنىڭ بولاشاعىنا كۇمان كەلتىرمەيمىن. بىزدە تالانتتى اقىندار دا، تالانتتى جازۋشىلار دا جوق ەمەس. بىراق سول تالانتتار مەن تالانتسىزدار ميداي ارالاسىپ، جاقسىلارى جامانداردان وق بويى وزىپ، قارا ءۇزىپ كەتە الماي ءجۇر. ماسەلەن، قۇداي تالانت بەرگەن، ولەڭنىڭ تەحنيكاسىن جاقسى مەڭگەرگەن، ۇيقاستارى شىمىر اقىندار از ەمەس. ولاردىڭ دەنىنە ورتاق ءبىر كەمشىلىك بار. «جاڭا عاسىردا الەم قايدا بەت الدى، ادامزاتتىڭ قانداي قۇندىلىقتارى العا وزىپ بارادى، شەتەل اقىندارى قانداي جىر جازىپ جاتىر؟» دەگەن سەكىلدى سۇراقتارعا باس قاتىرمايدى. ءبىر سوزبەن ايتساق، كوبىنىڭ تاريح پەن بۇگىنگى زامان، قالا بەردى كوركەم ادەبيەتتىڭ باستى قاعيدالارى ءتوڭىرەگىندەگى كوزقاراستارى توبىرلىق دەڭگەيدە. باياعى ەسكى داعدىلاردان، كەڭەستىك داۋىردە بويعا سىڭگەن كونە تۇسىنىكتەردەن ارىلا الماي جۇرگەن سەكىلدى»،—دەدى قالامگەر.
