بىتىمگە نارازىلىق. يزرايلدە ءۇش مينيستر قىزمەتىنەن باس تارتتى

يزرايل ۇكىمەتىنىڭ ءۇش ءمينيسترى وتستاۆكاعا كەتتى، دەپ حابارلايدى «ادىرنا» ۇلتتىق پورتالى dw-گە سىلتەمە جاساپ.   وڭشىل "ەۆرەي كۇشى" (وتسما ەحۋديت) پارتياسى ءيزرايلدىڭ حاماس ۇيىمىمەن جاسالعان بىتىمىنە نارازىلىق رەتىندە ءۇش ءمينيستردىڭ وتستاۆكاعا كەتكەنىن مالىمدەدى. "ەۆرەي كۇشى" پارتياسىنىڭ كوشباسشىسى، ءيزرايلدىڭ ۇلتتىق قاۋىپسىزدىك ءمينيسترى يتامار بەن-گۆير پرەمەر-مينيستر بينيامين نەتانياحۋدى "يدەولوگيالىق قىزىل سىزىقتاردى كەسىپ ءوتتى" دەپ ايىپتاپ، حاماس-پەن جاسالعان كەلىسىمدى "تەرروريزمنىڭ تولىق جەڭىسى" دەپ اتادى. ۇلتتىق قاۋىپسىزدىك مينيسترىنەن بولەك، ونىڭ پارتيالاستارى – مۇرالار ءمينيسترى اميحاي ەلياگۋ جانە نەگەۆ، گاليلەيا جانە ۇلتتىق تۇراقتىلىق ىستەرى ءمينيسترى يتسحاك ۆاسسەرلاۋف تا قىزمەتتەرىنەن باس تارتتى. سونىمەن قاتار، "ەۆرەي كۇشى" پارتياسى دا باسقارۋشى كواليتسيا قۇرامىنان شىقتى. پارتيا وكىلدەرى اسكەري ارەكەتتەر حاماس-قا قارسى قايتا باستالعان جاعدايدا ۇكىمەتكە ورالۋعا دايىن ەكەندەرىن جەتكىزدى. ءبىتىم تۋرالى شەشىمدى قارجى ءمينيسترى جانە ء"دىني سيونيزم" پارتياسىنىڭ جەتەكشىسى بەتسالەل سموتريچ تە سىنعا الدى. دەگەنمەن، نەتانياحۋ مەن بەن-گۆيرمەن وتكەن كەزدەسۋدەن كەيىن سموتريچ ازىرگە ۇكىمەتتەن شىقپاۋعا ۋادە بەردى. الايدا ول ءبىتىمنىڭ ەكىنشى كەزەڭىنە كوشۋ تۋرالى شەشىم قابىلدانسا، كواليتسيادان شىعاتىنىن ەسكەرتتى. ءسموتريچتىڭ وتستاۆكاعا كەتۋى مەرزىمىنەن بۇرىن سايلاۋ وتكىزۋگە اكەلۋى مۇمكىن.