رەسەي سىرتقى ىستەر ءمينيسترى سەرگەي لاۆروۆ قازاقستاننىڭ اقتاۋ قالاسىندا قۇلاعان ازەربايجان اۋە كومپانياسىنىڭ ۇشاعىنداعى قارا جاشىكتەردىڭ مازمۇنى تۋرالى پىكىر ءبىلدىردى، دەپ حابارلايدى "ادىرنا" ۇلتتىق پورتالى.
ونىڭ ايتۋىنشا، جاشىكتەردەگى دەرەكتەر كوپ قىزىقتى اقپارات بەرگەنىمەن، باق-تا تاراعان اپاتقا قاتىستى مالىمەتتەردى راستاماعان. بۇل تۋرالى ول وتكەن جىلعى رەسەيلىك ديپلوماتيانىڭ جۇمىس قورىتىندىسى بويىنشا وتكەن ءباسپاسوز ءماسليحاتىندا ايتتى.
لاۆروۆ مەديا كەڭىستىگىندە قارا جاشىكتەردەن الىنعان اقپاراتتى نەگىزسىز قولدانۋ ارقىلى جاعدايدى ۋشىقتىرماۋعا شاقىردى. ءمينيستردىڭ ايتۋىنشا، تەرگەۋ اياسىندا برازيليادا ارنايى كەزدەسۋ وتكەن.
«ءبىز قارا جاشىكتەردى اشتىق، ولاردىڭ مازمۇنى تەرگەۋدى تولىق اياقتاۋدى كۇتۋ قاجەتتىگىن تاعى ءبىر رەت دالەلدەيتىن كوپتەگەن قىزىقتى اقپارات بەردى»، – دەدى لاۆروۆ.
رەسەي مەن ازەربايجان اراسىنداعى قارىم-قاتىناس تۋرالى ايتقان سەرگەي لاۆروۆ ولاردىڭ بايلانىسى سەنىمدى ەكەنىن اتاپ ءوتتى. سونداي-اق، ەكى ەل پرەزيدەنتتەرى تۇراقتى تۇردە سويلەسىپ، تالقىلاۋعا جابىق تاقىرىپتاردىڭ جوق ەكەنىن مالىمدەدى.
«رەسەي پرەزيدەنتى [ۆلاديمير] پۋتين مەن ازەربايجان پرەزيدەنتى [يلحام] اليەۆ ۇكىمەتتەردى ءوزارا ءتيىمدى جاڭا جوبالاردى ىزدەۋگە ىنتالاندىرۋ باعىتىندا جاقسى جولعا قويىلعان»، – دەپ قوستى مينيستر.
ەسكە سالا كەتەيىك، 25 جەلتوقسان كۇنى باكۋدەن گروزنىيعا باعىت العان ازەربايجاننىڭ Azerbaijan Airlines (AZAL) اۋە كومپانياسىنا تيەسىلى Embraer 190 ۇشاعى اقتاۋ قالاسى ماڭىندا اپاتقا ۇشىرادى. اۋە كەمەسىنىڭ بورتىندا 67 ادام بولعان، ونىڭ ىشىندە بەس ەكيپاج مۇشەسى بار. اپات سالدارىنان 38 ادام قازا تاۋىپ، 29 ادام امان قالدى.
7 قاڭتاردا برازيليادا قۇلاعان ۇشاقتىڭ قارا جاشىكتەرىن شيفرىن شەشۋ اياقتالعانى بەلگىلى بولدى. قارا جاشىكتىڭ ەكى جازعىشىنان الىنعان ءتيىستى اقپارات قازاقستان بيلىگىنە جىبەرىلگەنى حابارلاندى.
15 قاڭتاردا قازاقستان Azerbaijan Airlines اۋە كومپانياسىنىڭ ۇشاعىنان الىنعان قارا جاشىكتەردىڭ برازيليادان جەتكىزىلگەن دەرەكتەرىن زەرتتەۋگە كىرىستى.
