«كەڭ دالا 2» باعدارلاماسى اقمولا وبلىسىنداعى اۋىل شارۋاشىلىعى تاۋارىن وندىرۋشىلەرگە قولداۋ كورسەتەتىن ماڭىزدى قۇرالعا اينالدى. باعدارلاما اياسىندا بەرىلەتىن جەڭىلدەتىلگەن نەسيەلەر اگرارشىلارعا كوكتەمگى ەگىس جانە كۇزگى ەگىن جيناۋ جۇمىستارىن ۋاقىتىلى وتكىزۋگە، كاسىپورىنداردىڭ تيىمدىلىگىن ارتتىرۋعا جانە ولاردى دامىتۋعا سەپتىگىن تيگىزۋدە.
باعدارلاماعا قاتىسىپ، ونىڭ يگىلىگىن كورىپ وتىرعان شارۋاشىلىقتاردىڭ ءبىرى – ساندىقتاۋ اۋدانىنداعى «ماكسيموۆسكوە» جشس. شارۋاشىلىق 2024 جىلى «دامۋ» كاسىپكەرلىكتى دامىتۋ قورىنىڭ كەپىلدىگىمەن 500 ملن تەڭگە كولەمىندە نەسيە الدى. بۇل قاراجات وسىمدىكتەردى قورعاۋ قۇرالدارىن، مينەرالدى تىڭايتقىشتاردى، جانارماي مەن قوسالقى بولشەكتەردى ساتىپ الۋ سياقتى قاجەتتىلىكتەردى ۋاقىتىلى وتەۋگە مۇمكىندىك بەردى.
– «كەڭ دالا 2» باعدارلاماسىنىڭ ارقاسىندا ءبىز ەگىن جيناۋ ناۋقانىن ويداعىداي وتكىزدىك. 2024 جىلدىڭ قاراشاسىندا نەسيە قارىزىن مەرزىمىنەن بۇرىن، تولىقتاي وتەدىك. ءبىرىنشى بولىپ قاراجاتتى وتەدىك جانە تاعى قاتىسۋ ءۇشىن ءتيىستى قۇجاتتارىمىزدى تاپسىرعان ەدىك. بۇگىن سول قۇجاتتارعا قول قويىپ، الداعى كوكتەمگى ەگىس جۇمىستارىنا دايىندىق ءۇشىن 800 ملن تەڭگە الدىق»، – دەپ اتاپ ءوتتى «ماكسيموۆسكوە» جشس ديرەكتورى الەكساندر زاكۋسيلوۆ.
سونىمەن بىرگە، ول اتالمىش باعدارلامانىڭ بۇرىندارى ەكىنشى دەڭگەيلى بانكتەردەن جوعارى پايىزدىق ستاۆكامەن نەسيە الىپ جۇرگەن شارۋالار ءۇشىن ءتيىمدى ەكەنىن اتاپ ءوتتى. ونىڭ سوزىنشە، باعدارلاما ارقىلى وسى قيىندىقتار جويىلىپ، قولايلى جاعداي جاسالىپ وتىر. ەندى ءوڭىردىڭ اگروونەركاسىپ كەشەنى جەڭىلدەتىلگەن نەسيگە قول جەتكىزىپ قانا قويما، سالانىڭ دامۋىنا سەپتىگىن تيگىزەتىنى ءسوزسىز.
«كەڭ دالا 2» باعدارلاماسى اياسىندا 2025 جىلدىڭ كوكتەمگى ەگىس جانە ەگىن جيناۋ جۇمىستارىنا ارنالعان 32 ملرد تەڭگە كولەمىندە نەسيە جەلىسىن اشۋ بويىنشا «اگرارلىق نەسيە كورپوراتسياسى» اق مەن «سپك KOKSHE» اق اراسىندا نەگىزدەمەلىك كەلىسىم جاسالدى.
«بۇگىنگى تاڭدا «سپك KOKSHE» اق-دا 26,6 ملرد تەڭگە سوماسىنا 69 اۋىل شارۋاشىلىعى وندىرۋشىلەرىنىڭ پۋلىن قۇردىق. ونىڭ ىشىندە 7,5 ملرد تەڭگە كولەمىندەگى 22 ءوتىنىم جارقايىڭ اۋدانىنان كەلىپ ءتۇستى»، – دەپ ءتۇسىندىردى «سپك KOKSHE» اق-نىڭ نەسيەلەۋ دەپارتامەنتىنىڭ ديرەكتورى دينا احمەتجانوۆا.
ەسكە سالا كەتەيىك، «كەڭ دالا 2» باعدارلاماسى اياسىندا 2024 جىلى اقمولا وبلىسىنىڭ 35 اۋىل شارۋاشىلىعى تاۋارىن ءوندىرۋشى 11 ملرد تەڭگە كولەمىندە قارجىلاندىرۋ الىپ، وڭىردە ماۋسىمدىق دالا جۇمىستارىنا ءتيىمدى دايىندىق جۇرگىزىلدى. «كەڭ دالا 2» باعدارلاماسى وڭىردەگى اگرارشىلاردى قولداۋدى جالعاستىرىپ، اۋىل شارۋاشىلىعى ءوندىرىسىنىڭ تۇراقتىلىعى مەن دامۋىن قامتاماسىز ەتۋدە.
