«Keń dala 2» baǵdarlamasy Aqmola oblysyndaǵy aýyl sharýashylyǵy taýaryn óndirýshilerge qoldaý kórsetetin mańyzdy quralǵa aınaldy. Baǵdarlama aıasynda beriletin jeńildetilgen nesıeler agrarshylarǵa kóktemgi egis jáne kúzgi egin jınaý jumystaryn ýaqytyly ótkizýge, kásiporyndardyń tıimdiligin arttyrýǵa jáne olardy damytýǵa septigin tıgizýde.
Baǵdarlamaǵa qatysyp, onyń ıgiligin kórip otyrǵan sharýashylyqtardyń biri – Sandyqtaý aýdanyndaǵy «Maksımovskoe» JShS. Sharýashylyq 2024 jyly «Damý» kásipkerlikti damytý qorynyń kepildigimen 500 mln teńge kóleminde nesıe aldy. Bul qarajat ósimdikterdi qorǵaý quraldaryn, mıneraldy tyńaıtqyshtardy, janarmaı men qosalqy bólshekterdi satyp alý sııaqty qajettilikterdi ýaqytyly óteýge múmkindik berdi.
– «Keń dala 2» baǵdarlamasynyń arqasynda biz egin jınaý naýqanyn oıdaǵydaı ótkizdik. 2024 jyldyń qarashasynda nesıe qaryzyn merziminen buryn, tolyqtaı ótedik. Birinshi bolyp qarajatty ótedik jáne taǵy qatysý úshin tıisti qujattarymyzdy tapsyrǵan edik. Búgin sol qujattarǵa qol qoıyp, aldaǵy kóktemgi egis jumystaryna daıyndyq úshin 800 mln teńge aldyq», – dep atap ótti «Maksımovskoe» JShS dırektory Aleksandr Zakýsılov.
Sonymen birge, ol atalmysh baǵdarlamanyń buryndary ekinshi deńgeıli bankterden joǵary paıyzdyq stavkamen nesıe alyp júrgen sharýalar úshin tıimdi ekenin atap ótti. Onyń sózinshe, baǵdarlama arqyly osy qıyndyqtar joıylyp, qolaıly jaǵdaı jasalyp otyr. Endi óńirdiń agroónerkásip kesheni jeńildetilgen nesıge qol jetkizip qana qoıma, salanyń damýyna septigin tıgizetini sózsiz.
«Keń dala 2» baǵdarlamasy aıasynda 2025 jyldyń kóktemgi egis jáne egin jınaý jumystaryna arnalǵan 32 mlrd teńge kóleminde nesıe jelisin ashý boıynsha «Agrarlyq nesıe korporaııasy» AQ men «SPK KOKSHE» AQ arasynda negizdemelik kelisim jasaldy.
«Búgingi tańda «SPK KOKSHE» AQ-da 26,6 mlrd teńge somasyna 69 aýyl sharýashylyǵy óndirýshileriniń pýlyn qurdyq. Onyń ishinde 7,5 mlrd teńge kólemindegi 22 ótinim Jarqaıyń aýdanynan kelip tústi», – dep túsindirdi «SPK KOKSHE» AQ-nyń nesıeleý departamentiniń dırektory Dına Ahmetjanova.
Eske sala keteıik, «Keń dala 2» baǵdarlamasy aıasynda 2024 jyly Aqmola oblysynyń 35 aýyl sharýashylyǵy taýaryn óndirýshi 11 mlrd teńge kóleminde qarjylandyrý alyp, óńirde maýsymdyq dala jumystaryna tıimdi daıyndyq júrgizildi. «Keń dala 2» baǵdarlamasy óńirdegi agrarshylardy qoldaýdy jalǵastyryp, aýyl sharýashylyǵy óndirisiniń turaqtylyǵy men damýyn qamtamasyz etýde.
