ازەربايجان پرەزيدەنتى يلحام اليەۆ ازەربايجاندىقتاردىڭ اقتاۋ ماڭىندا اپاتقا ۇشىراپ، قازا بولۋىنا رەسەي فەدەراتسياسىنىڭ وكىلدەرى كىنالى ەكەنىن مالىمدەدى. بۇل تۋرالى ول 6 قاڭتاردا Embraer 190 جولاۋشىلار ۇشاعى ەكيپاجىنىڭ قازا بولعان مۇشەلەرىنىڭ وتباسىمەن جانە امان قالعان بورتسەرىكتەرمەن كەزدەسۋ بارىسىندا ايتتى، دەپ حابارلايدى «ادىرنا» ءتىلشىسى.
«وتانداستىرىمىزدىڭ قازا تابۋىنا رەسەي فەدەراتسياسىنىڭ وكىلدەرى كىنالى دەپ تولىق سەنىممەن ايتا الامىن. ءبىز ادىلدىكتى، كىنالىلەردى جازالاۋدى، سونداي-اق اشىقتىق پەن ادامي قارىم-قاتىناستى تالاپ ەتەمىز»،—دەدى ول.
پرەزيدەنت قازىرگى تاڭدا قارا جاشىكتى دەكودتاۋ پروتسەسى ءجۇرىپ جاتقانىن اتاپ ءوتتى.
«جاقىن ارادا الدىن الا ناتيجە بەلگىلى بولىپ، بارلىق جاعداي ءوز ورنىنا كەلەدى. قايعىلى وقيعانىڭ جاي-جاپسارى انىقتالادى. بۇل، ارينە، وسى تراگەديانىڭ تولىق تەرگەۋى مەن كىنالىلەردى جازالاۋدا ماڭىزدى ءسات بولادى»، - دەپ تولىقتىردى اليەۆ.
بۇعان دەيىن رەسەي پرەزيدەنتى ۆلاديمير پۋتين ازەربايجان پرەزيدەنتى يلحام اليەۆكە تەلەفون سوعىپ، گروزنىي ۇستىندە زىمىران جارىقشاقتارى ءتيىپ، اقتاۋدا اپاتقا ۇشىراعان ۇشاق ءۇشىن كەشىرىم سۇراعان بولاتىن.
ايتا كەتەيىك، ۇشاق 25 جەلتوقساندا اقتاۋ ماڭىندا اپاتقا ۇشىراعان ەدى. ۇشاقتا بارلىعى 67 جولاۋشى، ونىڭ ىشىندە 6 قازاقستاندىق بولعان. اۋە اپاتىنان 29 ادام امان قالدى. 29 جەلتوقساندا قازا بولعان ازەربايجاندىقتاردىڭ دەنەسى ەلدەرىنە جەتكىزىلدى.
