2024 جىلدىڭ جەلتوقسان ايىندا ەلىمىزدىڭ بارلىق ايماقتارىندا «ءورت قاۋىپسىزدىگى ايلىعى» باستالىپ، تۇرعىنداردىڭ قاۋىپسىزدىگىن قامتاماسىز ەتۋ باعىتىندا اۋقىمدى پروفيلاكتيكالىق شارالار قولعا الىندى. بۇل تۋرالى اقمولا وبلىسى تجد مەملەكەتتىك ءورت باسقارۋ باسقارماسىنىڭ باسشىسى جاقسىباەۆ دوسبول بريفينگتە مالىمدەدى، دەپ حابارلايدى وڭىرلىك كوممۋنيكاتسيالار قىزمەتىنەن.
ايلىق بارىسىندا وبلىس كولەمىندە بىرنەشە باعىتتا جۇمىستار جۇرگىزىلىپ، ءورت قاۋىپسىزدىگى تالاپتارىنىڭ ساقتالۋىنا ەرەكشە كوڭىل بولىنگەن. الەۋمەتتىك ءالسىز توپتاعى وتباسىلار مەن بۇرىن قاۋىپسىزدىك ەرەجەلەرىن بۇزعان تۇرعىن ۇيلەر قايتا تەكسەرىلىپ، 39 مىڭنان استام جەكە ءۇي مەن 99 مىڭنان استام تۇرعىن قامتىلدى. وسى ۇيلەردىڭ كوبى اۆتونومدى جىلۋ جۇيەسىمەن جابدىقتالعاندىقتان، ولاردا ءورت قاۋىپسىزدىگىنە قاتىستى الدىن الۋ شارالارى ەرەكشە نازاردا بولدى.
«ءورت قاۋىپسىزدىگى ايلىعى» اياسىندا 500-دەن استام گاز جانە ءتۇتىن دەتەكتورلارى ورناتىلدى. بۇل قۇرىلعىلار ۇيدە ءورت شىعۋ قاۋپى بولعان جاعدايدا دەر كەزىندە ەسكەرتۋ جاساپ، تۇرعىنداردى قورعاۋعا مۇمكىندىك بەرەدى. سونىمەن قاتار، 800-دەن استام جىلۋ پەشىنىڭ ءتۇتىن جولدارى تازارتىلىپ، 1000-نان استام اقپاراتتىق-ناسيحاتتىق ماتەريالدار تۇرعىندارعا تاراتىلدى. وسى ارقىلى ادامدارعا قاۋىپسىزدىك ەرەجەلەرى مەن ساقتىق شارالارى جايلى ەسكە سالىندى»،- دەدى دوسبول جاقسىباەۆ.
جاڭا جىلدىق مەرەكەلەر قارساڭىندا قالالار مەن اۋىلداردا قاۋىپسىزدىكتى قامتاماسىز ەتۋ ءۇشىن ارنايى دايىندىق جۇمىستارى جۇرگىزىلدى. 545 نىسان، سونىڭ ىشىندە مەكتەپتەر، مادەنيەت ۇيلەرى، مەيرامحانالار مەن كافە تەكسەرىلدى. مۇندا 157 زاڭبۇزۋشىلىق انىقتالىپ، ولار شۇعىل تۇردە تۇزەتىلدى. مەرەكەلىك ءىس-شارالار بارىسىندا قاۋىپسىزدىكتى قامتاماسىز ەتۋ ءۇشىن 20 جەدەل توپ قۇرىلىپ، 15 بىرلەسكەن وقۋ-جاتتىعۋ وتكىزىلدى. بۇل ءىس-شارالار ءورت سوندىرۋشىلەر مەن باسقا دا توتەنشە جاعدايلار قىزمەتىنىڭ ۇيلەسىمدى جۇمىسىن قامتاماسىز ەتتى.
ايلىق اياسىندا پيروتەحنيكالىق بۇيىمداردىڭ زاڭسىز ساۋداسىنا قارسى رەيدتەر دە جۇرگىزىلدى. 160 رەيدتىڭ ناتيجەسىندە 279 زاڭسىز پيروتەحنيكالىق بۇيىم تاركىلەنىپ، 80 اكىمشىلىك حاتتاما تولتىرىلدى. بۇل شارالار ارقىلى ازاماتتاردى قاۋىپسىزدىككە جاتپايتىن پيروتەحنيكالىق ونىمدەردەن قورعاۋ ماقساتىندا ماڭىزدى قادامدار جاسالدى.
سونىمەن قاتار، كاسىپكەرلەردىڭ ءورت قاۋىپسىزدىگى تالاپتارىن ساقتاۋ ماسەلەسى دە نازاردان تىس قالعان جوق. «اتامەكەن» ۇلتتىق كاسىپكەرلەر پالاتاسىندا كاسىپكەرلەر مەن مەملەكەتتىك ورگانداردىڭ وكىلدەرىمەن ارنايى دوڭگەلەك ۇستەل ءوتتى. وندا مەيرامحانالار، كافە مەن كلۋب يەلەرىنە ءورت قاۋىپسىزدىگىنە قاتىستى ناقتى كەڭەستەر مەن ۇسىنىستار بەرىلدى. بۇل شارا كاسىپكەرلەردىڭ جاۋاپكەرشىلىگىن ارتتىرۋعا باعىتتالعان.
سپيكەر ءسوزىن تۇيىندەي كەلە «ءورت قاۋىپسىزدىگى ايلىعى» بارىسىندا اتقارىلعان جۇمىستار تۇرعىنداردىڭ قاۋىپسىزدىگىن قامتاماسىز ەتۋگە باعىتتالعان ماڭىزدى شارالار بولعانىن ايتتى. تۇرعىنداردى قاۋىپسىزدىك ەرەجەلەرىن ساقتاۋعا شاقىردى.
