رەسەيدىڭ ىشكى ىستەر مينيسترلىگى قازاقستاندىق پوليتسەيلەرگە جادىناما جولدادى. بۇل تۋرالى 5 قاڭتاردا اتىراۋ وبلىستىق پد ايتتى، دەپ حابارلايدى «ادىرنا» ءتىلشىسى.
«ىشكى ىستەر مينيسترلىگىنىڭ اتىنا رەسەي فەدەراتسياسىنىڭ ءىىم-نەن رەسەي فەدەراتسياسىنىڭ اۋماعىنا كىرەتىن قازاقستان رەسپۋبليكاسىنىڭ ازاماتتارىنىڭ ەسىرتكى قىلمىسىنا تارتىلۋىنىڭ الدىن الۋ ماقساتىندا قۇرامىندا ەسىرتكى بار «ادىراسپان» وسىمدىگىنىڭ زاڭسىز اينالىمى ءۇشىن قىلمىستىق جانە اكىمشىلىك جاۋاپكەرشىلىك كوزدەلگەنى تۋرالى جادىناما كەلىپ ءتۇستى»،—دەلىنگەن حابارلامادا.
ايتا كەتەيىك، رەسەي فەدەراتسياسىنىڭ قولدانىستاعى زاڭناماسىنا سايكەس ادىراسپان قۇرامىندا ەسىرتكى نەمەسە پسيحوتروپتىق زاتتار نەمەسە ولاردىڭ پرەكۋرسورلارى بار وسىمدىكتەر تىزىمىنە ەنگىزىلگەن بولاتىن. بۇل وسىمدىكتى ەلدىڭ مەملەكەتتىك شەكاراسى ارقىلى زاڭسىز وتكىزگەنى ءۇشىن ءۇش جىلدان جەتى جىلعا دەيىنگى مەرزىمگە باس بوستاندىعىنان ايىرۋ كوزدەلگەن.
