ابحازيادا ءورت سالدارىنان بەس بالا قايتىس بولدى. قايعىلى جاعدايعا بايلانىستى 6 قاڭتار رەسپۋبليكادا ازا تۇتۋ كۇنى بولىپ جاريالاندى، دەپ حابارلايدى "ادىرنا" ۇلتتىق پورتالى.
ابحازيانىڭ گال اۋدانىنا قاراستى پاپىنىرحۋا (سابەريو) اۋىلىندا ءبىر ءۇيدىڭ بەس قىزى ورتتەن كوز جۇمدى.
"اجە ۇيدە بالالارمەن جالعىز بولعان. تاڭەرتەڭ پەشتى جاعۋعا ارەكەتتەنىپ، بەنزين مەن ديزەل وتىنىن شاتاستىرىپ العان. سونىڭ سالدارىنان ءورت تۇتانىپ، اعاش ءۇي لەزدە جالىنعا ورانعان. سول ۋاقىتتا جاسى ءبىر جارىم مەن سەگىز ارالىعىنداعى بەس بالا ۇيىقتاپ جاتقان. ولاردى قۇتقارىپ ۇلگەرۋ مۇمكىن بولمادى،" – دەپ تۇسىنىكتەمە بەردى ابحازيانىڭ توتەنشە جاعدايلار مينيسترلىگىنىڭ گال بولىمشەسى.
ابحازيانىڭ پرەزيدەنت مىندەتىن اتقارۋشى بادرا گۋنبا قايتىس بولعان قىزداردىڭ وتباسىنا قاجەتتى كومەك كورسەتۋدى جانە وقيعانىڭ بارلىق ءمان-جايىن انىقتاۋ ءۇشىن مۇقيات تەرگەۋ جۇرگىزۋدى تاپسىردى.
كەيىننەن گۋنبا ارنايى جارلىق شىعارىپ، 6 قاڭتاردى رەسپۋبليكادا ازا تۇتۋ كۇنى دەپ جاريالادى. بارلىق مەملەكەتتىك مەكەمەلەردە مەملەكەتتىك تۋلار تومەن تۇسىرىلەدى، مادەني مەكەمەلەردە، تەلەديدار مەن راديودا ويىن-ساۋىق باعدارلامالارى مەن حابارلار توقتاتىلادى.
