اقمولا وبلىسىنىڭ ادىلەت دەپارتامەنتى 2024 جىلى ءوزىنىڭ مەملەكەتتىك قىزمەتتەرىن جاقسارتۋعا، قۇقىقتىق ءتارتىپتى قامتاماسىز ەتۋگە جانە ازاماتتارمەن ءتيىمدى جۇمىس جاساۋعا باعىتتالعان كوپتەگەن ماڭىزدى شارالاردى جۇزەگە اسىردى. دەپارتامەنت جۇمىسىندا تسيفرلاندىرۋ، زاڭ كومەگىن كورسەتۋ، مەملەكەتتىك تىركەۋ جانە زياتكەرلىك مەنشىك قۇقىقتارىن قورعاۋ سالالارىندا ايتارلىقتاي جەتىستىكتەرگە قول جەتكىزىلدى. بۇل تۋرالى وبلىستىق ادىلەت دەپارتامەنتىنىڭ باسشىسى باۋكەن المەش بريفينگتە مالىمدەدى، دەپ حابارلايدى وڭىرلىك كوممۋنيكاتسيالار قىزمەتىنەن.
ادىلەت ورگاندارىنىڭ نەگىزگى مىندەتتەرىنىڭ ءبىرى – نورماتيۆتىك-قۇقىقتىق اكتىلەردى تىركەۋ. 2024 جىلدىڭ 11 ايىندا اقمولا وبلىسىنا 827 نقا جوباسى كەلىپ ءتۇستى، ونىڭ ىشىندە 184 نقا جەرگىلىكتى اتقارۋشى ورگانداردان تىركەۋگە قابىلداندى. بۇل جۇمىستاردىڭ ساپالى جۇرگىزىلۋى زاڭداردىڭ كۇشىنە ەنۋىن قامتاماسىز ەتۋ ءۇشىن اسا ماڭىزدى بولىپ تابىلادى. سونىمەن قاتار، اتقارىلعان جۇمىستار ناتيجەسىندە 14 لاۋازىمدى تۇلعا اكىمشىلىك، 6 ادام تارتىپتىك جازاعا تارتىلدى.
وسى جىلى ادىلەت دەپارتامەنتى كوپتەگەن مەملەكەتتىك قىزمەتتەردى تولىقتاي ەلەكتروندىق فورماتقا اۋىستىردى. بۇل شارا ازاماتتاردىڭ قىزمەتتەرگە قول جەتكىزۋىن جەڭىلدەتىپ، ۋاقىتتى ۇنەمدەۋگە مۇمكىندىك بەردى. ماسەلەن، اتتەستاتتاۋ ءراسىمى اۆتوماتتاندىرىلىپ، نوتارياتتىق، ادۆوكاتتىق جانە جەكە سوت ورىنداۋشىسىنىڭ قىزمەتىنە ارنالعان وتىنىشتەر جەڭىلدەتىلدى. ەلەكتروندى جۇيەلەر ارقىلى مەملەكەتتىك قىزمەت كورسەتۋدىڭ 12 ءتۇرى جۇزەگە اسىرىلدى، ال جالپى 1774 قىزمەت كورسەتىلدى.
سونىمەن قاتار، ادىلەت دەپارتامەنتى تسيفرلاندىرۋدى دامىتۋعا ەرەكشە كوڭىل بولەدى. 2024 جىلى «Digital Justice» باستاماسى اياسىندا بىرنەشە جوبالار ىسكە قوسىلدى. مىسالى، «EGOV Mobile business» قوسىمشاسى ارقىلى زاڭدى تۇلعالار سەنىمحاتتاردى قاعازسىز جانە ۋاقىتتى ۇنەمدەي وتىرىپ، ەلەكتروندىق تسيفرلىق قولتاڭبا ارقىلى راسىمدەي الادى. ال «تسيفرلىق نوتاريات» جوباسى تاراپتاردىڭ ورنالاسقان جەرىنە قاراماستان نوتارياتتىق قىزمەتتەردى ونلاين الۋ مۇمكىندىگىن ۇسىنادى. بۇل قىزمەتتەر ازاماتتاردىڭ ۋاقىتى مەن قارجىسىن ۇنەمدەۋگە، سونىمەن قاتار نوتاريۋستارعا قاتىستى پروتسەسستەردىڭ اشىقتىعىن قامتاماسىز ەتۋگە مۇمكىندىك بەرەدى.
قۇقىقتىق كومەك كورسەتۋ سالاسىندا دا وڭ وزگەرىستەر بايقالدى. 2024 جىلى اقمولا وبلىسىندا 363 ادۆوكات جانە 23 زاڭ كونسۋلتانتى مەملەكەت كەپىلدىك بەرگەن زاڭ كومەگىن ۇسىندى.
«جاڭا زاڭدىق وزگەرىستەر ناتيجەسىندە تەگىن زاڭ كومەگىنە قۇقىعى بار ازاماتتار سانى كەڭەيتىلدى. بۇدان باسقا، «ە-زاڭ كومەگى» جوباسى اياسىندا ازاماتتار ءوز قۇقىقتىق سۇراقتارىنا ونلاين جاۋاپ الا الادى. جاساندى ينتەللەكتپەن جابدىقتالعان چات-بوت ارقىلى بۇل قىزمەت تاۋلىك بويى قولجەتىمدى بولادى. جوبانىڭ باستى ماقساتى — ازاماتتاردىڭ قۇقىقتىق اقپاراتقا قولجەتىمدىلىگىن ارتتىرۋ»،- دەدى باۋكەن المەش.
اقمولا وبلىسىندا زياتكەرلىك مەنشىك قۇقىقتارىن قورعاۋ باعىتىندا دا جۇمىستار جالعاسىن تاپتى. 2024 جىلى 13 تاۋار بەلگىسىنىڭ زاڭسىز پايدالانىلۋى تۋرالى وتىنىشتەر قارالدى. ادىلەت دەپارتامەنتى جوسپاردان تىس 8 تەكسەرۋ جۇرگىزىپ، كونترافاكتىلىك ونىمدەر مەن جارنامالىق ماتەريالداردى پايدالانۋ فاكتىلەرىن انىقتادى. بۇل جۇمىستاردىڭ ناتيجەسىندە ايىپپۇلدار سالىندى، تاۋار تاڭبالارىنا قاتىستى قۇقىق بۇزۋشىلىقتار انىقتالدى جانە سوتقا بىرنەشە ءىس جىبەرىلدى. سونىمەن قاتار، اقمولا وبلىسىنان 6 ونىمگە گەوگرافيالىق كورسەتكىشتەرگە كۋالىك بەرىلدى، بۇل وڭىرلىك ونىمدەردىڭ تانىمالدىلىعىن ارتتىرۋعا مۇمكىندىك بەرەدى.
سپيكەردىڭ ايتۋىنشا، اتقارۋشىلىق ءىس جۇرگىزۋ سالاسىندا دا ايتارلىقتاي جەتىستىكتەر تىركەلدى. 2024 جىلدىڭ 11 ايىندا جەكە سوت ورىنداۋشىلارى (جسو) مەن مەملەكەتتىك سوت ورىنداۋشىلارى (مسو) جالپى سوماسى 3 ميلليارد 191 ميلليون تەڭگە بولاتىن 87,126 اتقارۋشىلىق ءىس جۇرگىزدى. بۇل كەزەڭدە 53,698 ءىس اياقتالدى، ونىڭ ىشىندە 806 ميلليون تەڭگە سوماسىنداعى قارىز ءوندىرىلدى. سونىمەن قاتار، بورىشكەرلەرگە قاتىستى اكىمشىلىك جانە قىلمىستىق جاۋاپكەرشىلىككە تارتۋ شارالارى دا قابىلداندى.
اقمولا وبلىسى ادىلەت دەپارتامەنتى قۇقىقتىق مادەنيەتتى ارتتىرۋعا باعىتتالعان شارالاردى بەلسەندى تۇردە جۇرگىزدى. 2024 جىلى دەپارتامەنت 244 ءىس-شارا ۇيىمداستىرىپ، 59,814 ازاماتتى قامتىدى. سونىمەن قاتار، وبلىستىڭ اۋىلدى ايماقتارىندا زاڭ كابينەتتەرى قۇرىلىپ، ازاماتتارعا قۇقىقتىق كومەك كورسەتۋ شارالارى كۇشەيتىلدى. دەپارتامەنت جىل سايىن «ادىلەت كەڭەس بەرەدى» جانە «تەگىن زاڭ كومەگى كۇندەرى» سەكىلدى اكتسيالار ۇيىمداستىرادى، ونىڭ بارىسىندا ازاماتتار تەگىن كەڭەستەر الا الادى.
جەكە سوت ورىنداۋشىلارىنىڭ قىزمەتى دە قاتاڭ باقىلاۋعا الىندى. 2024 جىلى جسو-نىڭ 191 جوسپاردان تىس باقىلاۋى جۇرگىزىلىپ، ولاردىڭ قىزمەتىندەگى كەمشىلىكتەر مەن زاڭ بۇزۋشىلىقتار انىقتالدى. قورىتىندىسىندا، 56 جسو تارتىپتىك كەڭەسكە تارتىلىپ، 1 جسو ليتسەنزياسىنان ايىرىلدى. بۇل باقىلاۋ شارالارى جەكە سوت ورىنداۋشىلارىنىڭ قىزمەتىنىڭ ساپاسىن ارتتىرۋعا باعىتتالعان.
اقمولا وبلىسى ادىلەت دەپارتامەنتىنىڭ جۇمىسى قۇقىقتىق ءتارتىپتى قامتاماسىز ەتۋ، ازاماتتاردىڭ قۇقىقتارىن قورعاۋ جانە مەملەكەتتىك قىزمەتتەردى جەتىلدىرۋگە باعىتتالعان كوپتەگەن باستامالاردى قامتىدى. تسيفرلاندىرۋ، زاڭ كومەگىن كورسەتۋ، زياتكەرلىك مەنشىك قۇقىقتارىن قورعاۋ جانە اتقارۋشىلىق ءىس جۇرگىزۋ سالالارىنداعى جەتىستىكتەر دەپارتامەنتتىڭ ازاماتتارمەن تىعىز بايلانىس ورناتۋداعى تابىستىلىعىنىڭ ايقىن كورىنىسى بولىپ تابىلادى.
