نارىقتا تۇتىنۋشىنىڭ قۇقىعى باستى نازاردا بولۋى ءتيىس. ويتكەنى، تاۋارلار مەن قىزمەتتەردىڭ ساپاسى تۇتىنۋشىلاردىڭ قاجەتتىلىكتەرىن قاناعاتتاندىرۋمەن قاتار، ولاردىڭ قۇقىعىن قورعاۋدى دا تالاپ ەتەدى. وسى باعىتتا مەملەكەت تاراپىنان جۇيەلى جۇمىستار اتقارىلىپ كەلەدى. بۇل جونىندە اقمولا وبلىسى ساۋدا جانە تۇتىنۋشىلاردىڭ قۇقىقتارىن قورعاۋ دەپارتامەنتىنىڭ باسشىسى ەرلان اۋباكىروۆ بريفينگتە مالىمدەدى، دەپ حابارلايدى وڭىرلىك كوممۋنيكاتسيالار قىزمەتىنەن.
2024 جىلى دەپارتامەنتكە ازاماتتاردان 730 ءوتىنىش كەلىپ تۇسكەن. بۇل كورسەتكىش، تۇرعىنداردىڭ ءوز قۇقىقتارىن قورعاۋ بويىنشا بەلسەندى ەكەنىن كورسەتەدى. وتىنىشتەردىڭ 60%-ى بولشەك ساۋداعا قاتىستى بولسا، 7%-ى ەلەكتروندى ساۋداعا، 12%-ى تۇرعىن ءۇي-كوممۋنالدىق شارۋاشىلىق قىزمەتتەرىنە، ال 10%-ى تۋريستىك قىزمەتتەرگە قاتىستى بولدى. قارالعان وتىنىشتەردىڭ 83%-ى قاناعاتتاندىرىلىپ، تۇتىنۋشىلارعا 65 ميلليون تەڭگە كولەمىندە قارجى قايتارىلدى.
وسى تۇرعىدا، دەپارتامەنتتىڭ ماڭىزدى مىندەتى – ساپاسىز تاۋار مەن قىزمەتكە قاتىستى شاعىمداردى شەشۋ عانا ەمەس، كاسىپكەرلەردىڭ جاۋاپكەرشىلىگىن ارتتىرۋ. ويتكەنى، نارىقتاعى كەيبىر كومپانيالار ءوز ونىمدەرىنىڭ ساپاسىنا جەتكىلىكتى نازار اۋدارمايدى. ماسەلەن، اۆتوسالوندار مەن تۇرمىستىق تەحنيكانى ساتۋشى كومپانيالار ءجيى ساپاسىز ونىمدەرمەن كەزدەسەدى. بۇل جاعدايلار تۇتىنۋشىلاردىڭ قۇقىقتارىن بۇزۋ بولىپ تابىلادى، جانە ولاردى زاڭدى جولمەن قورعاۋ ماڭىزدى.
2024 جىلى دەپارتامەنت 367 كاسىپكەردى اكىمشىلىك جاۋاپكەرشىلىككە تارتتى. ونىڭ ىشىندە 336 كاسىپكەرگە ەسكەرتۋ بەرىلىپ، 31 كاسىپكەرگە جالپى سوماسى 669 634 تەڭگە ايىپپۇل سالىندى.
“قۇقىقبۇزۋشىلىقتاردىڭ باسىم بولىگى الەۋمەتتىك ماڭىزى بار ونىمدەرگە ساۋدا ۇستەمەسىن اسىرىپ قويۋمەن جانە باعا بەلگىلەرىنىڭ بولماۋىمەن بايلانىستى بولدى. بۇل جاعدايلار زاڭسىز ارەكەتتەردىڭ الدىن الۋ ءۇشىن قاتاڭ باقىلاۋدى قاجەت ەتەدى”،- دەيدى سپيكەر.
سونىمەن قاتار، تۇتىنۋشىلار بۇرىشىن ۇسىنباعان جانە تۇتىنۋشىلاردىڭ شاعىمدارىنا ۋاقىتىندا جاۋاپ بەرمەگەن كاسىپكەرلەرگە دە ايىپپۇلدار سالىندى. بۇل شارالار تۇتىنۋشىلاردىڭ قۇقىقتارىن قورعاۋدى قامتاماسىز ەتىپ، نارىقتاعى باسەكەلەستىكتىڭ ءادىل بولۋىن قامتاماسىز ەتەدى.
قازاقستاندىق ونىمدەردىڭ ساپاسىن ارتتىرۋ ماقساتىندا "ساپالى ءونىم" تۇجىرىمداماسى ىسكە اسىرىلۋدا. بۇل تۇجىرىمداما وتاندىق وندىرۋشىلەردى قولداۋعا جانە قازاقستاندىق ونىمدەردىڭ نارىقتاعى باسەكەگە قابىلەتتىلىگىن ارتتىرۋعا باعىتتالعان. 2024 جىلى وسى جوبانىڭ اياسىندا 53 ءونىم ءتۇرى تەكسەرىلىپ، ولاردىڭ ساپاسى مەن قاۋىپسىزدىگى زەرتتەلدى. وكىنىشكە وراي، 23 ونىمدە سانيتاريالىق نورمالار مەن تاڭبالاۋ تالاپتارىنىڭ بۇزىلعانى انىقتالدى. بۇل جاعدايلار، ەڭ الدىمەن، تۇتىنۋشىلاردىڭ دەنساۋلىعىنا قاۋىپ توندىرەدى. سوندىقتان مۇنداي ونىمدەرمەن جۇمىس ىستەيتىن كومپانيالار ايىپپۇل تولەپ، جاۋاپقا تارتىلدى.
“تۇتىنۋشىلاردىڭ قۇقىقتارىن قورعاۋ ءۇشىن، ءاربىر ازاماتقا بىرنەشە قاراپايىم كەڭەس بەرۋگە بولادى. بىرىنشىدەن، تاۋاردى ساتىپ الماس بۇرىن ونىڭ سيپاتتامالارىن، جارامدىلىق مەرزىمىن جانە پايدالانىلۋ شارتتارىن تەكسەرىڭىز. ەكىنشىدەن، چەكتى ساقتاڭىز. بۇل، اسىرەسە، تاۋاردى اۋىستىرۋ نەمەسە قايتارۋ قاجەت بولعان جاعدايدا ماڭىزدى قۇجات بولىپ تابىلادى. ۇشىنشىدەن، ەگەر دۇكەندە تۇتىنۋشىلار بۇرىشى جوق بولسا، وسى تۋرالى قۇزىرەتتى ورگاندارعا حابارلاۋعا بولادى. ويتكەنى ءاربىر دۇكەندە تۇتىنۋشى بۇرىشى بولۋى ءتيىس. قۇقىقتارىڭىز بۇزىلعان جاعدايدا، ساۋدا جانە تۇتىنۋشىلاردىڭ قۇقىقتارىن قورعاۋ دەپارتامەنتىنە جۇگىنۋدەن تارتىنباڭىز. ءبىز ارقاشان ءسىزدىڭ قۇقىقتارىڭىزدى قورعاۋ ءۇشىن جۇمىس ىستەيمىز. سونىمەن قاتار، «ە-tutynushy» جانە «ە-otinish» ءموبيلدى قوسىمشالارى ارقىلى ونلاين تۇردە شاعىم قالدىرۋعا، كەڭەس الۋعا جانە ءوتىنىشىڭىزدىڭ قارالۋ بارىسىن باقىلاۋعا بولادى”،- دەپ تولىقتىردى ەرلان اۋباكىروۆ.
ساۋدا جانە تۇتىنۋشىلاردىڭ قۇقىقتارىن قورعاۋ دەپارتامەنتى نارىقتاعى ادىلدىك پەن ساپانى قامتاماسىز ەتۋ ءۇشىن بەلسەندى جۇمىس اتقارىپ كەلەدى. تۇتىنۋشىنىڭ قۇقىقتارىن قورعاۋ - تەك زاڭنىڭ تالابىن ورىنداۋ ەمەس، سونىمەن قاتار، ءاربىر ازاماتتىڭ ادال ساۋدا جاساۋى ءۇشىن جاعداي جاساۋ بولىپ تابىلادى.
