Naryqta tutynýshynyń quqyǵy basty nazarda bolýy tıis. Óıtkeni, taýarlar men qyzmetterdiń sapasy tutynýshylardyń qajettilikterin qanaǵattandyrýmen qatar, olardyń quqyǵyn qorǵaýdy da talap etedi. Osy baǵytta memleket tarapynan júıeli jumystar atqarylyp keledi. Bul jóninde Aqmola oblysy saýda jáne tutynýshylardyń quqyqtaryn qorǵaý departamentiniń basshysy Erlan Áýbákirov brıfıngte málimdedi, dep habarlaıdy Óńirlik kommýnıkaııalar qyzmetinen.
2024 jyly departamentke azamattardan 730 ótinish kelip túsken. Bul kórsetkish, turǵyndardyń óz quqyqtaryn qorǵaý boıynsha belsendi ekenin kórsetedi. Ótinishterdiń 60%-y bólshek saýdaǵa qatysty bolsa, 7%-y elektrondy saýdaǵa, 12%-y turǵyn úı-kommýnaldyq sharýashylyq qyzmetterine, al 10%-y týrıstik qyzmetterge qatysty boldy. Qaralǵan ótinishterdiń 83%-y qanaǵattandyrylyp, tutynýshylarǵa 65 mıllıon teńge kóleminde qarjy qaıtaryldy.
Osy turǵyda, departamenttiń mańyzdy mindeti – sapasyz taýar men qyzmetke qatysty shaǵymdardy sheshý ǵana emes, kásipkerlerdiń jaýapkershiligin arttyrý. Óıtkeni, naryqtaǵy keıbir kompanııalar óz ónimderiniń sapasyna jetkilikti nazar aýdarmaıdy. Máselen, avtosalondar men turmystyq tehnıkany satýshy kompanııalar jıi sapasyz ónimdermen kezdesedi. Bul jaǵdaılar tutynýshylardyń quqyqtaryn buzý bolyp tabylady, jáne olardy zańdy jolmen qorǵaý mańyzdy.
2024 jyly departament 367 kásipkerdi ákimshilik jaýapkershilikke tartty. Onyń ishinde 336 kásipkerge eskertý berilip, 31 kásipkerge jalpy somasy 669 634 teńge aıyppul salyndy.
“Quqyqbuzýshylyqtardyń basym bóligi áleýmettik mańyzy bar ónimderge saýda ústemesin asyryp qoıýmen jáne baǵa belgileriniń bolmaýymen baılanysty boldy. Bul jaǵdaılar zańsyz áreketterdiń aldyn alý úshin qatań baqylaýdy qajet etedi”,- deıdi spıker.
Sonymen qatar, tutynýshylar buryshyn usynbaǵan jáne tutynýshylardyń shaǵymdaryna ýaqytynda jaýap bermegen kásipkerlerge de aıyppuldar salyndy. Bul sharalar tutynýshylardyń quqyqtaryn qorǵaýdy qamtamasyz etip, naryqtaǵy básekelestiktiń ádil bolýyn qamtamasyz etedi.
Qazaqstandyq ónimderdiń sapasyn arttyrý maqsatynda "Sapaly Ónim" tujyrymdamasy iske asyrylýda. Bul tujyrymdama otandyq óndirýshilerdi qoldaýǵa jáne qazaqstandyq ónimderdiń naryqtaǵy básekege qabilettiligin arttyrýǵa baǵyttalǵan. 2024 jyly osy jobanyń aıasynda 53 ónim túri tekserilip, olardyń sapasy men qaýipsizdigi zertteldi. Ókinishke oraı, 23 ónimde sanıtarııalyq normalar men tańbalaý talaptarynyń buzylǵany anyqtaldy. Bul jaǵdaılar, eń aldymen, tutynýshylardyń densaýlyǵyna qaýip tóndiredi. Sondyqtan mundaı ónimdermen jumys isteıtin kompanııalar aıyppul tólep, jaýapqa tartyldy.
“Tutynýshylardyń quqyqtaryn qorǵaý úshin, árbir azamatqa birneshe qarapaıym keńes berýge bolady. Birinshiden, taýardy satyp almas buryn onyń sıpattamalaryn, jaramdylyq merzimin jáne paıdalanylý sharttaryn tekserińiz. Ekinshiden, chekti saqtańyz. Bul, ásirese, taýardy aýystyrý nemese qaıtarý qajet bolǵan jaǵdaıda mańyzdy qujat bolyp tabylady. Úshinshiden, eger dúkende tutynýshylar buryshy joq bolsa, osy týraly quzyretti organdarǵa habarlaýǵa bolady. Óıtkeni árbir dúkende tutynýshy buryshy bolýy tıis. Quqyqtaryńyz buzylǵan jaǵdaıda, Saýda jáne tutynýshylardyń quqyqtaryn qorǵaý departamentine júginýden tartynbańyz. Biz árqashan sizdiń quqyqtaryńyzdy qorǵaý úshin jumys isteımiz. Sonymen qatar, «E-tutynushy» jáne «E-otinish» mobıldi qosymshalary arqyly onlaın túrde shaǵym qaldyrýǵa, keńes alýǵa jáne ótinishińizdiń qaralý barysyn baqylaýǵa bolady”,- dep tolyqtyrdy Erlan Áýbákirov.
Saýda jáne tutynýshylardyń quqyqtaryn qorǵaý departamenti naryqtaǵy ádildik pen sapany qamtamasyz etý úshin belsendi jumys atqaryp keledi. Tutynýshynyń quqyqtaryn qorǵaý - tek zańnyń talabyn oryndaý emes, sonymen qatar, árbir azamattyń adal saýda jasaýy úshin jaǵdaı jasaý bolyp tabylady.
