اقتاۋ قالاسى ماڭىندا بولعان اۋە اپاتىنان كەيىن جەرگىلىكتى تۇرعىندار زارداپ شەككەندەرگە كومەك كورسەتۋ ماقساتىندا قان تاپسىرۋدا، دەپ حابارلايدى "ادىرنا" ۇلتتىق پورتالى.
ماڭعىستاۋ وبلىستىق قان ورتالىعىنىڭ ماماندارى ءوڭىر تۇرعىندارىن مۇقتاج جاندارعا قولداۋ كورسەتۋگە شاقىردى.
سونىمەن قاتار، استانا قالاسىندا دا ازاماتتار قان تاپسىرۋعا بەلسەندىلىك تانىتىپ، ازەربايجان ەلشىلىگىنە گۇل شوقتارىن قويۋدا.
اقتاۋ قالاسىندا ورىن العان اۋە اپاتىنان كەيىن قازاقستاندىقتار مەن قۇتقارۋشىلاردىڭ كورسەتكەن جەدەل جانە جاناشىر ارەكەتتەرى ازەربايجاندىق باق تاراپىنان جوعارى باعالاندى. ازەربايجاندىق اقپارات قۇرالدارى قازاقستاندىقتاردىڭ، قۇتقارۋشىلار مەن دارىگەرلەردىڭ كاسىبيلىگى مەن ادامگەرشىلىگىنە العىس ءبىلدىرىپ، ولاردىڭ تراگەدياعا كورسەتكەن رەاكتسياسىن ەرەكشە اتاپ ءوتتى.
"ارنايى نازار اۋدارۋعا لايىق نارسە – قازاقستاندىق قۇتقارۋ قىزمەتتەرى مەن دارىگەرلەرىنىڭ جوعارى كاسىبيلىگى. بارلىق جۇمىستار جەدەل جۇرگىزىلۋدە. قازاقستاندىقتار جاپپاي قان تاپسىرۋدا! ولاردىڭ كۇش-جىگەرىنە العىسىمىزدى بىلدىرەمىز. راحمەت، قازاقستان!" – دەپ جازدى بەلگىلى ازەربايجاندىق Minval Politika پورتالىنىڭ جۋرناليستەرى.
سونىمەن قاتار، ازەربايجاندىق جۋرناليست جانە بلوگەر حاميد حاميدوۆ قازاقستان ازاماتتارىنا، اسىرەسە اپاتتان زارداپ شەككەندەرگە قان تاپسىرىپ جاتقان اقتاۋلىقتارعا العىس ءبىلدىردى.
"اقتاۋلىق باۋىرلارىم ۇشاق اپاتىنان امان قالعاندار ءۇشىن قان تاپسىرۋ ءۇشىن كەزەكتە تۇر. سىزدەرگە راقمەت!" – دەپ جازدى بلوگەر ءوزىنىڭ Facebook پاراقشاسىندا.
ەسكە سالا كەتەيڭك، بۇگىن اقتاۋ ماڭىندا Az Airlines اۋە كومپانياسىنا تيەسىلى جولاۋشىلار ۇشاعى قۇلادى. قازىرگى ۋاقىتتا زارداپ شەككەندەر مەن امان قالعاندار انىقتالۋدا. پرەزيدەنت قاسىم-جومارت توقاەۆتىڭ تاپسىرماسى بويىنشا مەملەكەتتىك كوميسسيا قۇرىلىپ، جۇمىس اتقارۋدا.
