«قازاق ماگنيتكاسىنىڭ» جاڭا ينۆەستورى Qarmet كومپانياسى، بۇرىن «ارسەلورميتتال تەمىرتاۋ» باسقارعان كەزدە كاسىپورىندا ارەكەت ەتكەن قىلمىستىق قۇرىلىمداردى جويۋ جۇمىسىن سوڭىنا دەيىن جەتكىزۋدى جوسپارلاپ وتىر، دەپ حابارلايدى "ادىرنا" ۇلتتىق پورتالى قازتاگ اگەنتتىگىنە سىلتەمە جاساپ.
«جاڭا ينۆەستور ەڭ الدىمەن شاحتەرلەر مەن مەتاللۋرگتەردى كوپ جىلدار بويى كاسىپورىندا ارەكەت ەتكەن قىلمىستىق جەلىدەن قورعاۋعا باستى نازار اۋدارادى. ارينە، كومبينات پەن ونىڭ ۇجىمىن توناۋعا ۇيرەنىپ قالعاندار، زاڭ مەن ءتارتىپ ورناتىلعانىن قالامايدى. شاحتەرلەردىڭ جاقسى تۇرمىسى، كومبيناتتىڭ تابىستى بولۋى، ەل ماقتانىشى، تمد-داعى كوشباسشى بولۋ ولارعا قاجەت ەمەس. ولار باسقا جولدارمەن اقشا تاپقان. ولار ءۇشىن جەكە مۇددە قوعامدىق جانە مەملەكەتتىك مۇددەدەن جوعارى. ارينە، ەسكى جۇيەنىڭ وكىلدەرى بۇل وزگەرىستەردى بۇرمالاپ، جالعان اقپارات تاراتىپ، كوپشىلىكتى اداستىرۋعا تىرىسادى»، – دەپ مالىمدەدى Qarmet.
«Qarmet» اكتسيونەرلىك قوعامىنىڭ باس ديرەكتورى ۆاديم ءباسيننىڭ ايتۋىنشا، قىلمىستىق توپتار ءتۇرلى ادىستەرگە جۇگىنەدى.
«وكىنىشكە وراي، ۇرلىق جاساۋ قۇقىعىن قورعاۋدىڭ كوپتەگەن جولدارى بار. بىراق ەڭ كوپ قولداناتىن ءادىس – قوعامدىق پىكىرمەن مانيپۋلياتسيا جاساۋ. ولار وزدەرىن قولدايتىن ادامداردى تارتۋعا تىرىسىپ، بارلىق رەسۋرستاردى پايدالانادى. بىراق، ءاردايىم كىمنىڭ نە ءۇشىن كۇرەسىپ جاتقانى انىق كورىنەدى. قازىرگى كەزدە ولار ءوز ارەكەتتەرىمەن تەك قانا وزدەرىنىڭ ۇرلىق جاساپ جاتقاندارىن كورسەتىپ وتىر. ولاردىڭ پوزيتسيالارى Qarmet-تە دە، ەلدە دە السىرەي بەرەدى. ويتكەنى ولار ادال جانە زاڭدى تۇردە جۇمىس ىستەۋدى قالامايدى، تەك قىلمىستىق سحەمالارعا جۇگىنەدى»، – دەدى باسين.
قازىر قىلمىستىق قۇرىلىمداردان تازارتۋ جۇمىسىنان بولەك، بارلىق قىلمىسكەرلەردى سوتقا تارتىپ، جازالاۋ مىندەتى تۇر. بۇعان قوسا، بۇرىن جابىلعان قىلمىستار، سونىڭ ىشىندە 90-شى جانە 2000-شى جىلدارداعى كاسىپورىن قىزمەتكەرلەرىنىڭ جوعالۋىنا قاتىستى تەرگەۋلەر قايتا جۇرگىزىلمەك. جالپى العاندا، پرەزيدەنت قاسىم-جومارت توقاەۆتىڭ ۇيىمداسقان قىلمىستىق توپتارمەن كۇرەس جونىندەگى تاپسىرماسىنا سايكەس، قۇقىق قورعاۋ ورگاندارى قىلمىستىق بەلسەندىلىكتى ايتارلىقتاي تومەندەتۋگە قول جەتكىزدى. قىلمىس دەڭگەيى ازايىپ، «جينالىستار» مەن «سترەلكالار» بولماعانى كورىنەدى.
«مەن ارقاشان اشىق جانە تىكەلەي ايتۋدى جاقسى كورەمىن – ءبىز ۇجىممەن كوپ جىلدان بەرى ادال جۇمىس ىستەپ كەلەمىز. ادامدار نە ىستەلگەنىن، قالاي ىستەلگەنىن، قاۋىپسىزدىك پەن مودەرنيزاتسياعا قانشا قاراجات جۇمسالعانىن كورەدى. ولار بولاشاقتارىن ءبىزدىڭ جالپى كاسىپورنىمىزدا كورەدى. بۇگىن ءبىز ءبىر كوماندا رەتىندە جۇمىس ىستەپ، ورتاق مىندەتتەردى بىرگە شەشىپ، ءوز ەلىمىز بەن ازاماتتارىمىز الدىنداعى جاۋاپكەرشىلىكتى سەزىنەمىز. مۇنىڭ ءبارى جۇمىس ورىندارىن كوبەيتۋگە، ەكونوميكاعا جانە ءبىزدىڭ بولىمشەلەرىمىز ورنالاسقان وڭىرلەردىڭ ينفراقۇرىلىمىنا ۇلەس قوسۋعا مۇمكىندىك بەرەدى. قيىن مۇرا رەتىندە العان تسەحتار مەن شاحتالاردىڭ جاعدايىن ءوز كوزىمەن كورگەندەر بىزدە ءالى كوپ جۇمىس بار ەكەنىن تۇسىنەدى. بىراق ءبىز بۇعان دايىنبىز، ءبىز جۇيەلى تۇردە العا جىلجىپ كەلەمىز»، – دەپ قورىتىندىلادى باسين.
