برازيليانىڭ وڭتۇستىگىندەگى گرامادۋ قالاسىنىڭ ورتالىعىندا شاعىن جەكەمەنشىك ۇشاق اپاتقا ۇشىرادى، دەپ حابارلايدى «ادىرنا» ءتىلشىسى.
جەرگىلىكتى باق-تىڭ مالىمەتىنشە، قايعىلى وقيعا 22 جەلتوقسان كۇنى تاڭەرتەڭ بولعان. ۇشاق الدىمەن عيماراتتىڭ مۇرجاسىنا، كەيىن ۇيگە، سوڭىندا جيھاز دۇكەنىنە سوعىلعان.
«اۋە كەمەسىندە بولعان بارلىق 10 ادام كوز جۇمدى. ۇشقىشتان باسقا 9 ادامنىڭ ءبارى – ءبىر وتباسىنىڭ مۇشەلەرى. ۇشۋ كەزىندە ايماقتا جاڭبىر مەن تۇمان بولعانى انىقتالدى»،—دەپ جازدى «رەيتەر» اگەنتتىگى.
ريۋ-گراندي-دۋ-سۋل شتاتىنىڭ ازاماتتىق قورعانىسىنىڭ مالىمەتىنشە، كەم دەگەندە 17 ادام زارداپ شەككەن. 2 ادامنىڭ ءحالى اۋىر. قازىرگى تاڭدا قايعىلى وقيعانىڭ سەبەبى تەرگەلىپ جاتىر.
