جەتىسۋ وبلىسى قۇرىلعاننان بەرى 43 جاڭا ءوندىرىس ىسكە قوسىلىپ، جۇمىس ىستەپ تۇرعان 9 ءوندىرىس كەڭەيتىلدى. سونىڭ ناتيجەسىندە ءبىر مىڭنان استام ادام جاڭا جۇمىسپەن قامتىلدى. بۇل جايىندا بۇگىن استانادا وتكەن بريفينگ كەزىندە جەتىسۋ وبلىسىنىڭ اكىمى بەيبىت يساباەۆ ايتتى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.
وبلىس باسشىسىنىڭ مالىمەتىنشە، كۇنباعىس مايىن وڭدەيتىن، كەيىنگى كەزدە توقتاپ تۇرعان «اگروكومپلەكس جەتىسۋ ماجيكو» زاۋىتى جۇمىسىن قايتا باستادى، ونىڭ جىلدىق قۋاتى - 500 توننا. تالدىقورعاندا ونەركاسىپ اككۋمۋلياتورلارىن وندىرەتىن «Asma Industrial» زاماناۋي زاۋىتى ىسكە قوسىلدى. سول سياقتى تاۋ-كەن سەكتورىن دامىتۋ اياسىندا قۇنى 1,3 ترلن. تەڭگە بولاتىن، 2 مىڭنان استام جۇمىس ورنىن قۇراتىن، قۋاتتىلىعى جىلىنا 860 مىڭ توننالىق مىس كونتسەنتراتىن قۇرايتىن مەتاللۋرگيا كومبيناتىن سالۋ بويىنشا ءىرى جوبانى ىسكە اسىرۋ باستالدى.
- مەملەكەت باسشىسىنىڭ جولداۋىندا اتاپ كورسەتىلگەندەي، ءبىز ەلىمىزدىڭ ونەركاسىپ الەۋەتىن تولىق پايدالانۋ ءۇشىن جان-جاقتى شارالار قابىلداۋىمىز قاجەت. بۇل رەتتە قازىر وبلىستا تسەمەنت، اككۋمۋلياتور باتارەيالارى، كەراميكا پليتكالارىن شىعارۋ جولعا قويىلىپ، قۇراما جەم، كۇن پانەلدەرىنىڭ ءوندىرىسى دامۋدا. جالپى وڭىردە 549 ونەركاسىپ ورنى تىركەلگەن، وندا 30 مىڭنان استام ادام جۇمىس ىستەيدى. وعان قوسا جەتىسۋدا بالامالى ەنەرگەتيكانى دامىتۋدىڭ زور الەۋەتى بار، - دەدى ب. يساباەۆ.
جالپى، وبلىستىڭ 2030 جىلعا دەيىنگى ينۆەستيتسيالىق پورتفەلىندە 2,6 ترلن. تەڭگەگە 189 جوبا بار، وندا ون ءبىر مىڭنان استام جۇمىس ورنىن قۇرۋ كوزدەلگەن، ونىڭ ىشىندە 121 جوبا ىسكە اسىرۋ ساتىسىندا.
