اقمولا وبلىسىندا سىبايلاس جەمقورلىققا قارسى ءىس-قيمىل بويىنشا 6 سىرتقى تالداۋ مەن 4 انتيكورپاراتيۆتى مونيتورينگ جۇرگىزىلدى. بۇل شارالار الەۋمەتتىك ماڭىزدى سالالارداعى جەمقورلىق تاۋەكەلدەرىن انىقتاۋعا باعىتتالعان. بۇل تۋرالى وبلىستىق سىبايلاس جەمقورلىققا قارسى ءىس-قيمىل دەپارتامەنتىنىڭ باسشىسى اسحات ورازحان بريفينگتە مالىمدەدى، دەپ حابارلايدى وڭىرلىك كوممۋنيكاتسيالار قىزمەتىنەن.
دەپارتامەنت جۇرگىزگەن تالداۋلار ناتيجەسىندە 56 ۇسىنىس پەن كەڭەس ەنگىزىلىپ، مەملەكەتتىك ورگاندار مەن جەرگىلىكتى اتقارۋشى ورگاندارعا سىبايلاس جەمقورلىق تاۋەكەلدەرىن جويۋ بويىنشا ناقتى قادامدار جاسالدى.
«بۇل ماسەلەلەر اسىرەسە جولداردى جوندەۋ مەن سالۋ كەزىندە كەزدەسىپ وتىر، سونىڭ ىشىندە جوسپارلاۋ، باقىلاۋ جانە كۇتىپ ۇستاۋ پروتسەستەرىندە. اقمولا وبلىسىنىڭ اكىمدىگىمەن بىرلەسىپ، بۇل ماسەلەلەردى شەشۋگە باعىتتالعان جوسپار ازىرلەنىپ، جۇزەگە اسىرىلۋدا»،-دەدى سپيكەر.
سونىمەن قاتار، وڭىردە اۋىل شارۋاشىلىعىنا قاتىستى سىبايلاس جەمقورلىق تاۋەكەلدەرى دە تالدانىپ، 300-دەن استام فەرمەردىڭ قۇقىقتارى قالپىنا كەلتىرىلدى. بۇل ءۇشىن فەرمەرلەرگە اۋىل شارۋاشىلىعى مينيسترلىگى ارقىلى سۋبسيديالار الۋ ءۇشىن قايتا ءوتىنىم بەرۋگە مۇمكىندىك بەرىلدى. قازىر 600 ميلليون تەڭگەدەن استام قارجىنىڭ بولىنۋىنە جاعداي جاسالىپتى.
اسحات ورازحاننىڭ مالىمەتىنشە اقمولا وبلىسىنداعى ءبىلىم سالاسىنداعى سىبايلاس جەمقورلىق تاۋەكەلدەرىنە قارسى ارەكەتتەر دە جالعاستىرىلۋدا.
«ءبىلىم باسقارماسى مەملەكەتتىك تاپسىرىستار مەن بيۋدجەتتىك وتىنىمدەردى ۇسىنۋ ءتارتىبىن رەتتەدى، سونداقتان دا بۇل سالادا سىبايلاس جەمقورلىقتىڭ الدىن الۋ بويىنشا ماڭىزدى قادامدار جاسالدى. ءارى قاراي وسى سالادا باقىلاۋ كۇشەيتىلىپ، بيۋدجەت قاراجاتىنىڭ دۇرىس جۇمسالۋىنا كەپىلدىك بەرىلەدى»،-دەدى ول.
دەپارتامەنت بيىلعى جىلى «بيزنەسكە جول» جوباسىن جۇزەگە اسىرۋدا دا بەلسەندى جۇمىس اتقاردى. بۇل جوبانىڭ نەگىزگى ماقساتى — كاسىپكەرلەردىڭ قۇقىقتارىن قورعاۋ جانە ولاردىڭ بيزنەس جۇرگىزۋىنە كەدەرگى كەلتىرەتىن اكىمشىلىك كەدەرگىلەردى جويۋ. بيىلعى جىلى 616 كاسىپكەردىڭ قۇقىقتارى قورعالىپ، 8 لاۋازىمدى تۇلعا جاۋاپكەرشىلىككە تارتىلدى.
سونىمەن قاتار، دەپارتامەنت مەملەكەتتىك ساتىپ الۋلاردا دا مۇقيات باقىلاۋ جۇرگىزىپ، قازىنا قاراجاتىنىڭ ءتيىمسىز جۇمسالۋىن الدىن الۋدا. 2024 جىلى مەملەكەتتىك ساتىپ الۋ بارىسىندا 1,2 ميلليارد تەڭگە ۇنەمدەلدى.
قۇقىقتىق ناسيحات جۇمىستارى دا سىبايلاس جەمقورلىقپەن كۇرەسۋدىڭ ماڭىزدى باعىتتارىنىڭ ءبىرى بولىپ تابىلادى. اقمولا وبلىسىندا وسى ماقساتتا جىل بويى «ءموبيلدى انتيكوررۋپتسيالىق توپ» جوباسى جۇزەگە اسىرىلدى.
بۇدان بولەك، سىبايلاس جەمقورلىقپەن كۇرەسكە باعىتتالعان قوعامدىق مونيتورينگتى دامىتۋ ءۇشىن دەپارتامەنت «انتيكوررۋپتسيالىق ۆولونتەر» جوباسىن قولعا الدى. ۆولونتەرلەر وبلىستاعى كوپتەگەن مەملەكەتتىك باعدارلامالار مەن جوبالاردىڭ ىسكە اسىرىلۋىن باقىلاپ، 619,4 ميلليون تەڭگە ۇنەمدەۋگە كومەكتەستى. سونىمەن قاتار، 877 ازاماتقا زاڭ كومەگى كورسەتىلدى.
سىبايلاس جەمقورلىققا قارسى جۇمىس الداعى ۋاقىتتا دا جالعاسا بەرمەك. جەمقورلىقتىڭ الدىن الۋ جانە ونى جويۋ ماقساتىندا بارلىق مەملەكەتتىك ورگاندار مەن قوعام بەلسەندىلەرى بىرىگىپ، قازاقستاننىڭ ءال-اۋقاتى مەن الەۋمەتتىك ادىلەتتىلىگىن ارتتىرۋ جولىندا جۇمىس ىستەيدى. وسى باعىتتا قابىلدانىپ جاتقان شارالار ازاماتتاردىڭ مەملەكەتكە دەگەن سەنىمىن كۇشەيتىپ، ەلىمىزدىڭ ەكونوميكالىق تۇراقتىلىعىن نىعايتۋعا باعىتتالعان.
