اقش-تا ChatGPT-كە قاتىستى زاڭ بۇزۋشىلىقتار ءۇشىن OpenAI كومپانياسىن ايىپتاعان بۇرىنعى قىزمەتكەرى ءولى كۇيىندە تابىلدى، دەپ حابارلايدى "ادىرنا" ۇلتتىق پورتالى CNBC News اگەنتتىگىنە سىلتەمە جاساپ.
سۋحير ءبالاجيدىڭ دەنەسى بىرنەشە اپتا بۇرىن سان-فرانتسيسكوداعى پاتەرىنەن تابىلعان. بۇل تۋرالى قالانىڭ باس سوت-مەديتسينالىق ساراپشىسى دەۆيد سەررانو سيۋەلل حابارلادى.
26 جاستاعى بالاجي 2024 جىلى OpenAI-دەن جۇمىستان شىعىپ، كومپانيانى اقش-تىڭ اۆتورلىق قۇقىق تۋرالى زاڭىن بۇزدى دەپ ايىپتاعان. سيۋەللدىڭ ايتۋىنشا، سوت-مەديتسينالىق ساراپشىلار ءبالاجيدىڭ ءوز-وزىنە قول جۇمساعانى تۋرالى قورىتىندى جاساعان.
OpenAI وكىلى ءبالاجيدىڭ قايتىس بولعانىن راستادى.
"بۇگىن بۇل وتە قايعىلى حاباردى ەستىپ، قاتتى كۇيزەلدىك", – دەپ مالىمدەدى ول تەلەارناعا بەرگەن سۇحباتىندا.
سۋحير بالاجي OpenAI-دە ءتورت جىلعا جۋىق ۋاقىت جاساندى ينتەللەكت زەرتتەۋشىسى بولىپ جۇمىس ىستەدى. ول ChatGPT جاساۋ كەزىندە پايدالانىلعان ۇلكەن دەرەكتەردى جيناۋعا جانە رەتتەۋگە كومەكتەسكەن.
تامىز ايىندا جاس جىگىت كومپانيادان كەتتى. كۇزدە ول The New York Times باسىلىمىنا سۇحبات بەرىپ، ءوز يدەيالاس ارىپتەستەرىن ونىڭ مىسالىن قايتالاۋعا شاقىردى. باسىلىم ءبالاجيدىڭ پىكىرىن كەلتىرىپ، OpenAI ChatGPT-ءتى جاساۋ بارىسىندا اۆتورلىق قۇقىقپەن قورعالعان بوتەن ينتەللەكتۋالدىق مەنشىكتى پايدالانۋ ارقىلى زاڭدى بۇزعانىن جازعان. ول مۇنداي تەحنولوگيالار قوعامعا پايداسىنان گورى زيانىن تيگىزەدى دەپ مالىمدەدى. سەبەبى ولار ادامداردىڭ، كاسىپورىنداردىڭ جانە ينتەرنەت-سەرۆيستەردىڭ "كوممەرتسيالىق ومىرشەڭدىگىن" بۇزادى. بۇلار ءوز كەزەگىندە چات-بوتتاردى وقىتۋ ءۇشىن پايدالانىلعان ماتەريالداردى جاساعان.
سوڭعى ەكى جىلدا جاساندى ينتەللەكت تەحنولوگيالارىن دامىتۋعا ماماندانعان كومپانيالارعا، سونىڭ ىشىندە OpenAI-گە، كوپتەگەن شاعىمدار تۇسكەن. شاعىمداردى باعدارلاماشىلار، سۋرەتشىلەر، دىبىس جازۋ كومپانيالارى، كىتاپ اۆتورلارى جانە باق بەرگەن.
ولاردىڭ اراسىندا امەريكالىق كاسىپكەر يلون ماسك تا بولدى. 2024 جىلدىڭ اقپان ايىندا ول OpenAI-ءدى شارتتاردى بۇزدى جانە باستاپقىدا ادامزاتتىڭ يگىلىگى ءۇشىن جاساندى ينتەللەكت تەحنولوگيالارىن جاساۋ ميسسياسىنان باس تارتتى دەپ ايىپتادى. الايدا، ماۋسىم ايىندا ماسك ءوز شاعىمىن قايتارىپ الدى.
