قوستاناي وبلىسى پروكۋراتۋراسىنىڭ جەكە قاۋىپسىزدىك باسقارماسى ارقالىق قالاسى پروكۋرورىنىڭ ورىنباسارىنا قاتىستى تەكسەرۋ جۇرگىزدى. تەكسەرۋ ناتيجەسى بويىنشا قالا پروكۋرورىنىڭ ورىنباسارى ەتيكا نورمالارىن بۇزعانى ءۇشىن قىزمەتىنەن بوساتىلدى، دەپ حابارلايدى "ادىرنا" ۇلتتىق پورتالى ناشا گازەتا-عا سىلتەمە جاساپ.
بۇل اقپاراتتى قوستاناي وبلىسى پروكۋراتۋراسى راستادى.
"2024 جىلعى 26 قاراشادا جۇرگىزىلگەن تەكسەرۋ ناتيجەسىندە كەنجەگارين پروكۋراتۋرا ورگاندارىنان بوساتىلدى. وعان قاتىستى قىلمىستىق ءىس قوزعالمادى. اتالعان قىزمەتكەر قۇقىق قورعاۋ ورگاندارى قىزمەتكەرلەرىنىڭ ادەپ كودەكسىنىڭ 7-بابىنىڭ 1-ءشى جانە 6-شى تارماقتارىنىڭ تالاپتارىن بۇزعانى ءۇشىن جۇمىستان بوساتىلدى. ونىڭ قىزمەتتىك ءىس-ارەكەتىندە ازاماتتار تاراپىنان دۇرىس باعالانباۋىنا بايلانىستى قىزمەتكەردىڭ، سونداي-اق تۇتاستاي پروكۋراتۋرا ورگاندارىنىڭ بەدەلىنە نۇقسان كەلتىرەتىن مىنەز-قۇلىققا جول بەرىلگەن", - دەدى قوستاناي وبلىسى پروكۋرورىنىڭ ءبىرىنشى ورىنباسارى باۋىرجان بەكبوسىنوۆ.
قىزمەتتىك تەرگەۋ قۇپياسىنا بايلانىستى ەكس-پروكۋروردىڭ ناقتى قانداي قاتەلىك جىبەرگەنى تۋرالى مالىمەت اشىلمادى.
