قايعىلى جاعدايدا قازا بولعان شەرزات بولاتتىڭ اكەسى قارجاۋباي نۇرىموۆقا قاتىستى قىلمىستىق ءىس قوزعالدى، دەپ حابارلايدى “ادىرنا” ۇلتتىق پورتالى.
بۇل تۋرالى ادۆوكات اسقار قايماقوۆ الەۋمەتتىك جەلىدەگى پاراقشاسىندا مالىمدەدى.
"تالعار ءىسى بويىنشا بىرنەشە ماڭىزدى مالىمدەمە جاساۋدى ءجون دەپ سانايمىن. ءبىزدىڭ وكىلدەر پوليتسيادان قارجاۋبايدى قاماۋعا الۋدى سۇراعان جوق. مارقۇم نۇرقاناتتىڭ جەكە حات-حابارلارىن جاريالاۋعا تۋىستارىنىڭ كەلىسىمى بولمادى. قارجاۋبايعا 15 تاۋلىككە قاماۋ تۇرىندە جازا تاعايىنداعان سوت شەشىمىن زاڭسىز دەپ ەسەپتەيمىز جانە اپەللياتسيالىق شاعىم تۇسىردىك. بۇگىن پوليتسيا قارجاۋباي نۇرىموۆقا قاتىستى قر قك 202-بابى (قاساقانا بوتەن مۇلىكتى جويۋ نەمەسە ءبۇلدىرۋ) بويىنشا سوتقا دەيىنگى تەرگەۋدى باستادى”، - دەپ جازدى ادۆوكات.
ەسكە سالايىق، قارجاۋباي نۇرىموۆ بۇعان دەيىن بالاسى شەرزات بولاتتىڭ ولىمىنە قاتىستى تەرگەۋ جۇمىستارىنىڭ ءادىل ءوتۋىن تالاپ ەتىپ، باق وكىلدەرىمەن كەزدەسۋدى سۇراعان بولاتىن. ال بۇگىن وتباسىنىڭ وزگە ايماققا كوشكەنى ايتىلدى.
