مەملەكەت باسشىسى دوحا فورۋمىنا شاقىرعانى ءۇشىن شەيح ءتاميم بەن حاماد ءال تانيگە العىس ايتىپ، جيىندا الەمدەگى وزەكتى پروبلەمالار بويىنشا اشىق پىكىر الماسۋعا مۇمكىندىك بەرەتىن بىرەگەي ديالوگ الاڭى ەكەنىن اتاپ ءوتتى، دەپ حابارلايدى "ادىرنا" ۇلتتىق پورتالى اقوردانىڭ ءباسپاسوز قىزمەتىنە سىلتەپ.
قاسىم-جومارت توقاەۆ قاتار ءامىرىنىڭ ستراتەگيالىق سەرىكتەستىك دەڭگەيىنە كوتەرىلگەن ەكىجاقتى قارىم-قاتىناستى نىعايتۋعا قوسقان ۇلەسىن جوعارى باعالايتىنىن جەتكىزدى.
اڭگىمەلەسۋ بارىسىندا بانك، تەلەكوممۋنيكاتسيا، ەنەرگەتيكا، اۋىل شارۋاشىلىعى جانە مەديتسينا سالالارىنداعى ينۆەستيتسيالىق جوبالارعا قاتىستى كەلىسىمدەردى ۋاقىتىلى ءارى ساپالى جۇزەگە اسىرۋ ماسەلەسىنە ەرەكشە ءمان بەرىلدى. قازاقستان پرەزيدەنتى قاتار بيزنەسىمەن بىرلەسكەن جوبالار ەكى ەلدىڭ دامۋىنا سەپتىگىن تيگىزەتىنىنە سەنىمدى ەكەنىن اتاپ ءوتتى.
قاسىم-جومارت توقاەۆ پەن شەيح ءتاميم بەن حاماد ءال ءتاني جوعارى دەڭگەيدەگى بەلسەندى ساياسي ديالوگ قازاق-قاتار قاتىناستارىن نىعايتۋعا الداعى ۋاقىتتا دا ىقپال ەتەتىنىنە نازار اۋداردى.
