وڭتۇستىك كورەيا پرەزيدەنتى يۋن سوك يول قوعامدىق نارازىلىق تۋدىرعان اسكەري جاعداي جاريالاعانى ءۇشىن حالىقتان كەشىرىم سۇرادى، دەپ حابارلايدى "ادىرنا" ۇلتتىق پورتالى.
"شىن كوڭىلدەن حالىقتان كەشىرىم سۇرايمىن. اسكەري جاعداي جاريالاۋعا بايلانىستى جاۋاپكەرشىلىكتەن جالتارمايمىن", - دەدى وڭتۇستىك كورەيا پرەزيدەنتى.
3 جەلتوقساندا كەشكە وڭتۇستىك كورەيا پرەزيدەنتى يۋن سوك ەل توتەنشە اسكەري جاعداي جاريالاعان ەدى. جاعدايعا قاتىستى قازاقستاننىڭ ەكس-ەلشىسى فەيسبۋك پاراقشاسىندا جازبا جاريالادى.
"جاڭا عانا، ياعني تاڭەرتەڭگى ساعات 10:00 - دە كورەيا رەسپۋبليكاسى پرەزيدەنتى يۋن سوك - يول مىرزا حالىققا ءسوز سويلەدى. وتە قىسقا. توقەتەرى:
1. حالىقتان كەشىرىم سۇرادى. ەكى رەت. باسىن ءيىپ.
2. ءوز شەشىمىنىڭ زاڭ تۇرعىسىنان بولسىن، باسقا دا جاعىنان ءوربيتىن سالدارىنان جالتارمايتىنىن ايتتى.
3. اتقارۋشى بيلىكتى تولىعىمەن جەتەكشى "حالىقتىڭ كۇشى" پارتياسىمەن بىرگە اتقاراتىنىن جەتكىزدى.
بۇل، دالىرەك ايتقاندا، قالاي بولادى، كىم بيلىكتى قانداي كولەمدە، قالاي اتقاراتىنىن ەگجەي - تەگجەيلى جەتكىزبەدى.
4. ەندىگىدە، ياعني ءوزى بيلىكتە تۇرعاندا ەكىنشى رەت توتەنشە اسكەري جاعدايى جاريا بولمايتىنىن ايتتى.
5. ءسوزىن تەز اياقتاپ، بولمەدەن شىعىپ كەتتى. بۇگىن ساعات 17:00 - لەردە (كورەيا ۋاقىتى) پارلامەنت يمپيچمەنت ماسەلەسىن قارايدى.
تۇسكى 2 - لەردەن باستاپ پارتيالاردىڭ جاقتاستارى، ەكى جاقتان دا، سەۋلدە شەرۋ وتكىزەدى.
بۇگىنگى كۇن اسا ماڭىزدى. بىراق، ماسەلە وسىمەن اياقتالمايدى.زاڭعا سايكەس جاسالاتىن قادامدار بار. مىسالى، پارلامەنت شەشىمىن (قابىلدانسا) كونستيتۋتسيالىق سوت قارايدى.
ەگەر يمپيچمەنت بۇگىن وتپەسە، بۇل ماسەلە كەيىنىرەككە شەگەرىلىپ، وپپوزيتسيا داۋىس جيناۋعا تىرىسىپ، تاعى دا قارايتىن بولادى. وپپوزيتسيا پارلامەنتتەگى باسىم كۇش. جالپى، ەلدەگى ساياسي جاعداي تۇراقسىز. وقيعالار ساعات سايىن ءوربىپ جاتىر... الايدا، كورەي جانە باسقا دا، ونىڭ ىشىندە ءبىزدىڭ ازاماتتارعا قاۋىپ ءتونىپ تۇرعان جوق. و.كورەيا - بەيبىت ەل", - دەپ جازدى دۋلات باكيشەۆ جازبادا.
قازاقستان ازاماتتارى توتەنشە جاعداي كەزىندە جەدەل بايلانىس ءۇشىن مىنا نومىرلەرگە حابارلاسا الادى: +8210-6572-9311.
