2024 جىلى 12 قاراشادا «وزەنمۇنايگاز» اق-عا قاراستى (بۇدان ءارى – ومگ) بۇرعىلاۋ جۇمىستارى باسقارماسى (بجب) قىزمەتكەرلەرىنىڭ كاسىپوداعى رۇقساتسىز اكتسيا ۇيىمداستىرىپ، بىرقاتار تالاپ قويعانى بەلگىلى. وزەنمۇنايگاز باسشىلىعى بجب جۇمىسشىلارىمەن تۇراقتى تۇردە كەلىسسوز جۇرگىزىپ كەلەدى.
سونىمەن قاتار، 2024 جىلى 3 جەلتوقساندا «قازمۇنايگاز» ۇك اق باسقارما توراعاسىنىڭ ورىنباسارى بەكزات ابايىلدانوۆ بۇرعىلاۋ جۇمىستارى باسقارماسى قىزمەتكەرلەرىمەن كەزدەسىپ، ولاردى جۇمىسقا شىعۋعا شاقىردى. كەلىسسوز قورىتىندىسى بويىنشا حاتتاما جاسالدى:
1. رۇقساتسىز اكتسياعا قاتىسقان بجب قىزمەتكەرلەرى تولىق قۇرامدا جۇمىسقا شىعۋى كەرەك.
2. حاتتامانىڭ ءبىرىنشى تارماعى ورىندالعان جاعدايدا، جۇمىسشىلارعا قمگ جانە ومگ تاراپىنان تارتىپتىك جازا قولدانىلمايدى;
3. بارلىق قويىلعان تالاپ قر زاڭناماسىنا سايكەس بىتىمگەرلىك كوميسسيا وتىرىسىندا قارالسىن.
حاتتاما رۇقساتسىز اكتسياعا شىققان جۇمىسشىلاردىڭ نازارىنا جەتكىزىلدى. الايدا، ومگ بجب كاسىپوداق توراعاسى وعان قول قويۋدان باس تارتتى.
قر زاڭناماسىنا سايكەس ەڭبەك قاتىناستارى ءۇشىنشى تۇلعالاردىڭ ارالاسۋىنسىز تىكەلەي جۇمىس بەرۋشى مەن جۇمىسشىلار اراسىندا رەتتەلۋى ءتيىس ەكەنىن حابارلايمىز.
«قازمۇنايگاز» ۇك اق وسىعان دەيىن ءار تالاپ بويىنشا تولىق تۇسىنىكتەمە بەرگەن بولاتىن. مىسالى، ومگ زەينەتكەرلەرىنىڭ (بۇرىنعى قىزمەتكەرلەرىنىڭ) بالالارى كومپانيانىڭ شتاتىنا تىكەلەي الىنسا، 2020 جىلى بەكىتىلگەن جۇمىسقا ورنالاسۋ الگوريتمىن بۇزادى. الگوريتمگە سايكەس ومگ زەينەتكەرلەرىنىڭ بالالارى مەن جۇمىسسىز ازاماتتار تەڭ دارەجەدە جۇمىسقا قابىلدانادى. بۇل تالاپتى ورىنداۋ مۇمكىن ەمەس، ويتكەنى جۇمىسقا ورنالاسۋ كەزەگىن كۇتىپ وتىرعان جاڭاوزەن قالاسىنىڭ باسقا جۇمىسسىز تۇرعىندارىنىڭ قۇقىعىن بۇزادى.
سونداي-اق، قازمۇنايگاز كومپانياسى ومگ قىزمەتكەرلەرىنە كورسەتىلەتىن الەۋمەتتىك كومەك تۋرالى تولىق اقپارات بەردى. ومگ مەن ءۇش كاسىپوداق اراسىنداعى ۇجىمدىق شارت 2024 جىلى 25 ساۋىردە جاسالدى. ۇجىمدىق شارتقا سايكەس ومگ قىزمەتكەرلەرىن الەۋمەتتىك قولداۋعا 44 ملرد تەڭگە قاراستىرىلعان، سونىڭ 5 ملرد تەڭگەسى (11%) كومپانيانىڭ بۇرعىلاۋ جۇمىستارى باسقارماسىنا ارنالعان.
ومگ-دە جاقسى ەڭبەك جاعدايى جاسالعان دەپ ەسەپتەيمىز، ءاربىر قىزمەتكەردى الەۋمەتتىك قولداۋعا جىل سايىن 3,8 ملن تەڭگە بولىنەدى.
