اقش پرەزيدەنتى دجو بايدەن ەكى قىلمىستىق ءىس بويىنشا كىنالى دەپ تانىلىپ، ۇكىمىن كۇتىپ وتىرعان ۇلى حانتەر بايدەنگە راقىمشىلىق جاسادى، دەپ حابارلايدى «ادىرنا» ءتىلشىسى BBC ارناسىنا سىلتەمە جاساپ.
«قىزمەتىمنىڭ ءبىرىنشى كۇنىنەن-اق ادىلەت مينيسترلىگىنىڭ شەشىمدەرىنە ارالاسپايتىنىمدى ايتقان ەدىم. ۇلىمنىڭ ادىلەتسىز قۋدالانىپ جاتقانىن كورسەم دە، مەن ءوز سوزىمدە تۇردىم»، — دەدى ول.
ماۋسىمدا القابيلەر 54 جاستاعى حانتەر بايدەندى 2018 جىلى قارۋ ساتىپ الۋ كەزىندە ءوزىنىڭ ەسىرتكىگە تاۋەلدى ەكەنىن جاسىرىپ، جالعان مالىمەت بەرگەنى ءۇشىن كىنالى دەپ تانىعان ەدى. بۇل اقش تاريحىنداعى پرەزيدەنتتىڭ بالاسى قىلمىس جاساعانى ءۇشىن سوتتالعان العاشقى جاعداي بولدى.
قىركۇيەكتە حانتەر بايدەن سالىق تولەۋدەن جالتارعانىن مويىندادى. وعان 2016–2019 جىلدار ارالىعىنداعى 1,4 ميلليون دوللار كولەمىندەگى سالىقتى تولەمەدى دەگەن ايىپ تاعىلدى. وسى قىلمىس ءۇشىن ول 15 جىلعا دەيىن باس بوستاندىعىنان ايىرىلۋى مۇمكىن ەدى.
1 جەلتوقسان كۇنى كەشكە جاريالاعان مالىمدەمەسىندە دجو بايدەن ۇلىنىڭ سوتى «ساياساتپەن لاستانعانىن» جانە سول ءۇشىن زاڭسىز شەشىمدەرمەن اياقتالعانىن جەتكىزدى.
«مەن بۇل شەشىمدى قابىلداعان كەزدە، ونى كەيىنگە قالدىرۋدىڭ قاجەتى بولمادى. امەريكالىقتار اكە مەن پرەزيدەنتتىڭ نەگە مۇنداي شەشىمگە كەلگەنىن تۇسىنەدى دەپ ۇمىتتەنەمىن»،— دەدى باسشى.
حانتەر بايدەنگە ۇكىم 12 جانە 16 جەلتوقساندا شىعارىلادى دەپ جوسپارلانعان بولاتىن. ەكىنشى جاعدايدا 2016-2019 جىلدارى 1,4 ميلليون دوللار كولەمىندە سالىق تولەۋدەن جالتارعانى ءۇشىن ول 15 جىلعا دەيىن باس بوستاندىعىنان ايىرىلۋى مۇمكىن ەدى.
ايتا كەتەيىك، دجو بايدەن تۋىسقانىنا راقىمشىلىق جاساعان العاشقى اقش پرەزيدەنتى ەمەس. 2001 جىلى بيلل كلينتون 1985 جىلى كوكاين ساقتاعانى ءۇشىن سوتتالعان ءوزىنىڭ تۋعان اعاسى، اكتەر جانە مۋزىكانت رودجەر كلينتونعا راقىمشىلىق جاساعان بولاتىن.
