AQSh prezıdenti Djo Baıden eki qylmystyq is boıynsha kináli dep tanylyp, úkimin kútip otyrǵan uly Hanter Baıdenge raqymshylyq jasady, dep habarlaıdy «Adyrna» tilshisi BBC arnasyna silteme jasap.
«Qyzmetimniń birinshi kúninen-aq ádilet mınıstrliginiń sheshimderine aralaspaıtynymdy aıtqan edim. Ulymnyń ádiletsiz qýdalanyp jatqanyn kórsem de, men óz sózimde turdym», — dedi ol.
Maýsymda alqabıler 54 jastaǵy Hanter Baıdendi 2018 jyly qarý satyp alý kezinde óziniń esirtkige táýeldi ekenin jasyryp, jalǵan málimet bergeni úshin kináli dep tanyǵan edi. Bul AQSh tarıhyndaǵy prezıdenttiń balasy qylmys jasaǵany úshin sottalǵan alǵashqy jaǵdaı boldy.
Qyrkúıekte Hanter Baıden salyq tóleýden jaltarǵanyn moıyndady. Oǵan 2016–2019 jyldar aralyǵyndaǵy 1,4 mıllıon dollar kólemindegi salyqty tólemedi degen aıyp taǵyldy. Osy qylmys úshin ol 15 jylǵa deıin bas bostandyǵynan aıyrylýy múmkin edi.
1 jeltoqsan kúni keshke jarııalaǵan málimdemesinde Djo Baıden ulynyń soty «saıasatpen lastanǵanyn» jáne sol úshin zańsyz sheshimdermen aıaqtalǵanyn jetkizdi.
«Men bul sheshimdi qabyldaǵan kezde, ony keıinge qaldyrýdyń qajeti bolmady. Amerıkalyqtar áke men prezıdenttiń nege mundaı sheshimge kelgenin túsinedi dep úmittenemin»,— dedi basshy.
Hanter Baıdenge úkim 12 jáne 16 jeltoqsanda shyǵarylady dep josparlanǵan bolatyn. Ekinshi jaǵdaıda 2016-2019 jyldary 1,4 mıllıon dollar kóleminde salyq tóleýden jaltarǵany úshin ol 15 jylǵa deıin bas bostandyǵynan aıyrylýy múmkin edi.
Aıta keteıik, Djo Baıden týysqanyna raqymshylyq jasaǵan alǵashqy AQSh prezıdenti emes. 2001 jyly Bıll Klınton 1985 jyly kokaın saqtaǵany úshin sottalǵan óziniń týǵan aǵasy, akter jáne mýzykant Rodjer Klıntonǵa raqymshylyq jasaǵan bolatyn.
